Lopetegui ៖ ​ម្សិលមិញ​ជា​ថ្ងៃ​អាក្រក់​បំផុត​របស់​ខ្ញុំ តែ​ថ្ងៃ​នេះ​ជា​ថ្ងៃ​ល្អ​បំផុត​របស់​ខ្ញុំ​វិញ

ក្លឹប Real Madrid ​បាន​ធ្វើ​ពិធី​បង្ហាញ​ខ្លួន​ជា​ផ្លូវការ​សម្រាប់​លោក Lopetegui ​ដែល​ជា​អ្នកចាត់ការ​ថ្មី​របស់​ក្លឹប​ហើយ បន្ទាប់​ពី​លោក​ត្រូវ​បាន​សហព័ន្ធ​អេស្ប៉ាញ​បណ្ដេញ​ចេញ​ពី​តួនាទី​គ្រូ​បង្វឹក​ក្រុម​ជម្រើស​ជាតិ។

អ្នក​ចាត់ការ​ថ្មី​ខាង​លើ​បាន​និយាយ​ក្នុង​សន្និសីទ​ថា​៖ “ម្សិលមិញ​ជា​ថ្ងៃ​មិន​សប្បាយ​ចិត្ត​បំផុត​ក្នុង​ជីវិត​ខ្ញុំ ​ចាប់​តាំង​ពី​ម្ដាយ​ខ្ញុំ​បាន​លាចាក​លោក​នេះ​ទៅ។ ប៉ុន្តែ​ថ្ងៃ​នេះ​វិញ គឺ​ជា​ថ្ងៃ​ដែល​ខ្ញុំ​រីករាយ​បំផុត។ ខ្ញុំ​ចង់​អរគុណ​ដល់​ប្រធាន​ក្លឹប Real Madrid ​សម្រាប់​ការ​ជឿជាក់ ​និង​ផ្ដល់​តម្លៃ​ដល់​រូប​ខ្ញុំ ​ឱ្យ​មក​ដឹក​នាំ​ក្រុម​មួយ​នេះ។ ខ្ញុំ​ដឹង​ថា​ខ្ញុំ​បាន​ចូល​ក្លឹប​អ្វី ​ហើយ​យើង​មាន​មហិច្ឆតា​កម្រិត​ណា។ យើង​នឹង​រួម​គ្នា​បង្កើត​ប្រវត្តិសាស្ត្រ​បន្ថែម​ទៀត”។

លោក Lopetegui ​ត្រូវ​តែងតាំង​ជា​អ្នក​ចាត់ការ​ក្រុម Real Madrid ​ក្នុង​កុងត្រា​រយៈ​ពេល​៣​ឆ្នាំ។ បុរស​ដែល​ធ្លាប់​ដឹក​នាំ​ក្រុម​យុវជន​ជម្រើស​ជាតិ​អេស្ប៉ាញ​ម្នាក់​នេះ ​មាន​ប្រវត្តិ​ដឹក​នាំ​ខ្លាំង ពោល​គឺ​២០​ប្រកួត​ជាមួយ​ជម្រើស​ជាតិ​អេស្ប៉ាញ ​មិន​ដែល​ចាញ់​នោះ​ទេ ​ឈ្នះ​១៤ ​ស្មើ​៦​ដង៕ប្រភព៖​ MARCA

ភ្ជាប់ទំនាក់ទំនងជាមួយ CTS SPORT