យប់​នេះ World Cup ​ចាប់​ផ្ដើម​ហើយ ​គូ​បើក​ឆាក រុស្ស៊ី ​ប៉ះ​អារ៉ាប៊ីសាអ៊ូឌីត

ព្រឹត្តិការណ៍ FIFA World Cup 2018 ​នឹង​ចាប់​ផ្ដើម​ដំណើរ​ការ​ប្រកួត​នា​រាត្រី​នេះ​ហើយ ​ដោយ​ក្រុម​ម្ចាស់​ផ្ទះ​រុស្ស៊ី ត្រូវ​ប៉ះ​ជាមួយ​ក្រុម​អារ៉ាប៊ីសាអ៊ូឌីត វេលា​ម៉ោង​១០​យប់​នេះ។

រុស្សី​ជា​ក្រុម​មួយ​ដែល​មិន​ទាន់​ស្គាល់​ជ័យជម្នះ​សោះ ​ក្នុង​រយៈ​ពេល​៧​ខែ​មក​ហើយ។ ពួកគេ​លេង​បាន​ត្រឹម​ចាញ់ និង​ស្មើ ប៉ុន្តែ​ភាគ​ច្រើន​នៃ​ការ​ប្រកួត​នោះ សុទ្ធ​តែ​ប៉ះ​ជាមួយ​ក្រុម​ខ្លាំង​ៗ​ដូចជា​អេស្ប៉ាញ ​ប្រេស៊ីល និង​បារាំង​ជា​ដើម។ លោក Stanislav Cherchesov ​គ្រូ​បង្វឹក​ក្រុម​រុស្ស៊ី​បាន​បញ្ជាក់​ថា​រាត្រី​នេះ នឹង​ក្លាយ​ជា​ការ​ប្រកួត​មួយ​ដែល​ប្រជាជន​រុស្ស៊ី​រង់ចាំ។ អ្នក​គ្រប់​គ្នា​នឹង​មក​ទស្សនា​ផ្ទាល់ ព្រឹត្តិការណ៍​ដ៏​អស្ចារ្យ​នេះ ​ជាមួយ​ក្ដី​រំពឹង​ខ្ពស់​ទៅ​លើ​ក្រុម​ជម្រើស​ជាតិ។

 

ដោយ​ឡែក​សម្រាប់​ក្រុម​អារ៉ាប៊ីសាអ៊ូឌីត​វិញ ​លោក​រដ្ឋ​មន្ត្រី​ Turki al-Sheikh ​បាន​ទៅ​និយាយ​ជាមួយ​កីឡាករ​និង​គ្រូ​បង្វឹក​ផ្ទាល់​តែ​ម្ដង។ ​​លោក​បាន​បញ្ជាក់​ថា​នេះ​ជា​ការ​ប្រកួត​មួយ​ដែល​ប្រជាជន​ អារ៉ាប៊ីសាអ៊ូឌីត​ទាំង​អស់ ​នឹង​ទស្សនា​​ហើយ​គាំទ្រ​ក្រុម​ជម្រើស​ជាតិ។ លទ្ធផល​ឈ្នះ គឺ​ជា​អ្វី​ដែល​ក្រុម​ទាំង​មូល​ចង់​បាន។

រុស្ស៊ី​៥​ប្រកួត​ចុង​ក្រោយ ​ចាញ់​៣​ដង ​និង​ស្មើ​២​ដង ​មិន​ទាន់​ឃើញ​ឈ្នះ​ឡើយ ​ដោយ​ឡែក​សម្រាប់​ក្រុម​ អារ៉ាប៊ីសាអ៊ូឌីត​វិញ ​៥​ប្រកួត​ចុង​ក្រោយ​ដូច​គ្នា ពួកគេ​ចាញ់​២​ដង ​ស្មើ​១​ដង ​និង​ឈ្នះ​បាន​២​ដង។  ក្រុម​ទាំង​ពីរ​នេះ ​ធ្លាប់​ជួប​គ្នា​ម្ដង​ហើយ​កាល​ពី​ឆ្នាំ​១៩៩៣ ​ដោយ​គ្រា​នោះ  អារ៉ាប៊ីសាអ៊ូឌីត ​បាន​យក​ឈ្នះ​ក្នុង​លទ្ធផល ៤-២៕ប្រភព៖ DailyMail

 

 

 

 

ភ្ជាប់ទំនាក់ទំនងជាមួយ CTS SPORT