Frenkie de Jong ត្រៀមនឹងចាកចេញទៅចូលរួមជាមួយ Barcelona នារដូវកាលក្រោយ ប៉ុន្តែត្រូវបំពេញកាតព្វកិច្ចជួយ Ajax ឲ្យឆ្លងផុត Champions League នៅវគ្គ ៤ ក្រុមចុងក្រោយនេះសិន។
ត្បិតអីអ្នកមានបុណ្យហាក់ពេញចិត្តកីឡាកររូបនេះជាខ្លាំង ប៉ុន្តែ De Jong ក៏នៅតែមិនប្រាកដប្រជាដោយហ៊ាននិយាយត្រង់ៗថាខ្លួនមិនសង្ឃឹមនឹងបានជាប់ជម្រើសដំបូងនៅទ្រនំថ្មីនោះឡើយ។ បង្ហើបប្រាប់សារព័ត៌មានហូឡង់៖ “ខ្ញុំមិនរំពឹងថាបានលេងជម្រើសដំបូងនៅ Barcelona ទេ ហើយខ្ញុំក៏នឹងនឹកនាគ្រប់យ៉ាងនៅ Ajax ដែលខ្ញុំបានរីករាយកន្លងមកនៅទីនេះ”។
ខ្សែបម្រើវ័យក្មេងរូបនេះបន្តថា៖ “ខ្ញុំពិតជាសោកសៅនឹងការចាកចេញនេះ តែក៏រីករាយនឹងទៅចូលរួមជាមួយ Barcelona”។
បញ្ជាក់ថា Ajax ដែលជាក្រុមយុវជនឡើងជើងនារដូវកាល ២០១៨/១ នេះ នឹងត្រូវបើកការតតាំងជាមួយម្ចាស់ផ្ទះ Tottenham នាព្រឹកថ្ងៃពុធសប្តាហ៍នេះ មុនហោះមកសម្រេចលទ្ធផលចាញ់ឈ្នះនៅទឹកដីហូឡង់នាសប្តាហ៍បន្ទាប់។
ប្រភព:BeSoccer