ជើងខ្លាំង ចាន់ រតនា នឹងត្រូវប្រឈមតទល់កីឡាករម្ចាស់ផ្ទះ Rudy Agustian នៅលើសង្វៀន ONE: FOR HONOR នៅថ្ងៃទី ៣ ខែ ឧសភា ឆ្នាំ ២០១៩ ខាងមុខ នារដ្ឋធានី ហ្សាកាតា ប្រទេស ឥណ្ឌូណេស៊ី។
ទាក់ទិនជំនួបនេះ ខុន ស៊ីចាន់ ដែលចាញ់ក្រោមក្បាច់ឃ្លេរបស់ Rudy កាលខែកុម្ភៈ ត្រឹមទឹកទី១ នោះបានបញ្ចេញមតិថា ៖«ខ្ញុំលំបាកសន្និដ្ឋានបន្តិច គូនេះ ព្រោះចាន់ រតនា គីឡូគាត់ធំ ហើយគាត់បញ្ចុះមក ៦១ គីឡូក្រាម ដូច្នេះឆាប់អស់កម្លាំងណាស់។ ខ្ញុំសង្ឃឹមថាគាត់អាចឈ្នះត្រឹមទឹកទី១ តែបើចូលទឹកទី២ និង ទី៣អាចចាញ់គេហើយ។ ខ្ញុំជឿជាក់លើគាត់ត្រឹមតែ ១ ទឹកប៉ុណ្ណោះ»។
កីឡាករមកពីក្លឹប Phnom Penh MMA រូបនេះបញ្ជាក់ទៀតថា ជំនាញរបស់ Rudy ល្អចាប់ល្អគាប ប៉ុន្តែជំនាញ ឈរវ៉ៃ និង តិកនិកវ៉ៃ ចាញ់ ចាន់ រតនា ទេ។ អ្នកលេងគុនខ្មែរនិងគុនចម្រុះរូបនេះនៅតែមានជំនឿចិត្តលើមិត្តរួមជាតិថាអាចសងសឹកជំនួសខ្លួនបាន បើសិនប្រើក្បាច់ខ្មែរបុរាណឲ្យបានច្រើន និង មិនឲ្យគេចូលចាប់បាន ពោលអាចឈ្នះដល់ ៩០% ឯណោះ។
នៅថ្ងៃទី ៣ ខែ ឧសភា ឆ្នាំ ២០១៩ ខាងមុខនារដ្ឋធានីហ្សាកាតា ប្រទេសឥណ្ឌូណេស៊ី មិនត្រឹមតែ Rudy Agustian និង ចាន់ រតនា ធ្វើឲ្យកក្រើកអ្នកគាំទ្រនៅកម្ពុជាទេ ប៉ុន្តែ ថែមទាំងមានកីឡាការិនីជម្រើសជាតិ នៅ ស្រីពៅ ប៉ះ កីឡាការិនីម្ចាស់ផ្ទះ Priscilla Hertati Lumban Gaol ទៀតផងនៅសង្វៀន ONE: FOR HONOR៕