លោក Jose Mourinho មានទំនុកចិត្តថាក្រុម Porto មានឱកាសដើម្បីទម្លាក់ក្រុម Liverpool ចេញពីពានរង្វាន់ UEFA Champions League ត្រឹមវគ្គ៨ក្រុមចុងក្រោយនេះបាន។
ក្រុមរបស់លោក Klopp នឹងត្រូវតតាំងជាមួយក្រុម Porto នៅយប់ថ្ងៃអង្គារសប្ដាហ៍ក្រោយនេះហើយ ដើម្បីប្រជែងយកកៅអីវគ្គពាក់កណ្ដាលផ្ដាច់ព្រ័ត្រ។ ជើងទី១នឹងលេងនៅទឹកដី Anfield ដែលជាកន្លែងក្រុមហង្សក្រហមធ្លាប់ហូបក្រុម Porto នេះ ៥-០ ម្ដងមកហើយកាលពីរដូវកាលមុន។ យ៉ាងណាមិញ ការប៉ះគ្នារដូវកាលនេះ លោក Jose Mourinho បែរជាមានទំនុកចិត្តថាក្រុមរបស់ព័រទុយហ្គាល់មួយនេះនឹងមានឱកាសវាយបកសងសឹកវិញបាន។
អ្នកចាត់ការដែលធ្លាប់ដឹកនាំក្រុម Porto លើកពាន Champions League កាលពីរដូវកាល ២០០៣-០៤ បាននិយាយដូច្នេះថា៖ “ខ្ញុំជឿជាក់ ថាក្រុម Porto អាចលេងជាមួយ Liverpool បាន។ អ្វីដែលកើតឡើងកាលពីរដូវកាលមុន ខ្ញុំគិតថាវាជាបទពិសោធសម្រាប់ក្រុម Porto ដើម្បីកែលម្អ និងធ្វើឱ្យបានលទ្ធផលផ្សេងនារដូវកាលនេះ។ Liverpool ពិតជាលេងបានល្អ ប៉ុន្តែការមិនបានសម្រាកសោះរបស់ពួកគេដែលប្រជែងលីគផងនោះ គឺជាចំណុចខ្សោយរបស់ពួកគេ”៕ប្រភព៖ Dailymail