Zidane ​៖ មិន​អាច​បន្ទោស​តែ Marcelo ​បាន​ទេ គឺ​ត្រូវ​បន្ទោស​ក្រុម​ទាំង​មូល

ក្រុម Real Madrid ​បាន​ចាញ់​ក្រុម Valencia ​ក្នុង​លទ្ធផល ២-១ ​នា​ការ​ប្រកួត​ក្របខណ្ឌ La Liga ​កាល​ពី​យប់មិញ​នេះ ​ធ្វើ​ឱ្យ​មាន​ការ​រិះគន់​ពី​សំណាក់​អ្នក​គាំទ្រ​យ៉ាង​ខ្លាំង។

Real Madrid ​មាន​គំលាត​ពិន្ទុ​ដល់​ទៅ​៥​ពិន្ទុ​ឯ​ណោះ​ពី​ក្រុម​លេខ​២ Atletico Madrid ហើយ​បើ​និយាយ​ពី​គំលាត​ក្រុម FC Barcelona ​វិញ ​មិន​បាច់​មើល​ឡើយ ពោល​គឺ​ដាច់​ដល់​ជាង​១០​ពិន្ទុ​ឯ​ណោះ។ ដោយ​គ្មាន​សង្ឃឹម​បាន​ពាន​ក្នុង​រដូវ​កាល​នេះ ​ហើយ​រង​ការ​រិះគន់​ច្រើន​ពី​សំណាក់​អ្នក​គាំទ្រ ​បាន​ធ្វើ​ឱ្យ​សមាជិក​ក្រុម Real Madrid ​កំពុង​រង​សម្ពាធ​ខ្លាំង​មែនទែន។ បើ​ទោះ​ជា​លោក Zidane ​មក​ដឹក​នាំ​ក្រុម​វិញ​ក៏​ដោយ ​ក៏​លទ្ធផល​នៅ​តែ​បរាជ័យ​ដដែល ជាក់​ស្ដែង​យប់មិញ​នេះ​ចាញ់​ក្រុម Valencia ​២-១។

ការ​លេង​មិន​ល្អ​យប់មិញ ​ដែល​ធ្វើ​ឱ្យ​ក្រុម​របូត​ដល់​២​គ្រាប់ ត្រូវ​បាន​អ្នក​គាំទ្រ​ដាក់​បន្ទុក​ទៅ​លើ​ខ្សែ​ការពារ​ស្លាប Marcelo ​ដែល​បាន​ចូល​លេង​ជម្រើស​១១​នាក់​វិញ ​២​ប្រកួត​មក​ហើយ ប៉ុន្តែ​លេង​មិន​បាន​ល្អ​សោះ។ លោក Zidane ​អ្នក​ចាត់ការ​ក្រុម Real Madrid ​បាន​ហៅ​ការ​ស្ដី​បន្ទោស​លើ​កីឡាករ​ប្រេស៊ីល​នេះ ថា​មិន​ត្រឹម​ត្រូវ​ឡើយ។ ការ​លេង​មិន​បាន​ល្អ​របស់​ក្រុម​នា​ពេល​នេះ គឺ​មក​ពី​កីឡាករ​ទាំង​អស់​តែ​ម្ដង ​មិន​មែន​មក​ពី​កីឡាករ​ណា​ម្នាក់​ឡើយ។

លោក​ដឹង​ថា​រដូវ​កាល​នេះ ជា​រដូវ​កាល​អន់​បំផុត​របស់​ក្រុម Real Madrid ​ដែល​អ្នក​គាំទ្រ​ត្រូវ​ឆ្លង​កាត់​ឱ្យ​បាន ​ហើយ​រំពឹង​ថា​រដូវ​កាល​ថ្មី​ខាង​មុខ​នឹង​ល្អ​ឡើង​វិញ​មិន​ខាន៕ប្រភព៖ Dailymail

 

 

 

 

 

 

ភ្ជាប់ទំនាក់ទំនងជាមួយ CTS SPORT