វេលាម៉ោង ០២:៣០ នាទីរំលងអាធ្រាត្រក្លឹប Valencia នឹងត្រូវបើកកីឡដ្ឋាន Mestalla ស្វាគមន៍ក្លឹបស្តេចស Real Madrid ដែលជាជំនួបជុំទី ៣០ សម្រាប់ក្របខ័ណ្ឌ LaLiga។
ស្ថិតិនៃការប៉ះគ្នាកន្លងមករវាងក្រុមទាំងពីរ ១៦២ លើក ឃើញថា Valencia ឈ្នះបាន ៤៣ លើក ស្មើ ៣៥ លើក និងចាញ់ ៨៤ លើក។ ប៉ុន្តែការជួបគ្នា ៦ ប្រកួតចុងក្រោយនៅទឹកដី Mestalla ស្តេចសធ្លាប់ឈ្នះបានតែម្តងគត់សម្រាប់ការប្រកួតទាំងក្នុងនិងក្រៅក្របខ័ណ្ឌ។
រំឭកថា Valencia សព្វថ្ងៃកំពុងធ្វើបានល្អខ្លាំង ដោយមិនទាន់ស្គាល់ពាក្យថា “បរាជ័យ” ក្នុង ១៦ ប្រកួតចុងក្រោយ (ឈ្នះ ៩ ស្មើ ៧)។ ចំណែកឯ Real Madrid ក៏ហាក់វិលត្រលប់មកទម្រង់លេងល្អជាបណ្តើរៗវិញ ក្នុងនោះ Isco ក៏រកបាន ២ គ្រាប់ហើយសម្រាប់ពីរប្រកួតបើកឆាកដំបូងរបស់ Zinedine Zidane។
ខាងក្រោមបង្ហាញពីជម្រើស ១១ រូបអាចប៉ះគ្នា៖
Valencia (4-4-2): Neto; Wass, Garay, Gabriel, Gaya; Soler, Parejo, Kondogbia, Guedes; Rodrigo, Gameiro
Real Madrid (4-1-2-1-2): Navas; Odriozola, Varane, Ramos, Marcelo; Casemiro; Modric, Kroos; Isco; Bale, Benzema