ណាហ្គាវ៉ើល ​ប៉ះក្រុមមិនទាន់ចាញ់ Tampines Rovers នៅ AFC CUP ល្ងាចនេះ

​​ក្រុម​ជើង​ឯក​លីគកំពូល​កម្ពុជា​ ណាហ្គាវើល​ នឹងបើកទ្វារពហុកីឡដ្ឋានជាតិ ទទួល​ភ្ញៀវ​​សិង្ហបុរី​ Tampines Rovers វេលា​ម៉ោង​៥​ល្ងាច​នេះ ក្នុងពូល F ប្រចាំពានរង្វាន់ AFC CUP។

២ប្រកួតដំបូងរបស់ Tampines Rovers ​​គឺ​ឈ្នះ​១​ និង​ស្មើ​១។ ជំនួបបើកឆាក ពួកគេវាយបកយក​ ឈ្នះ​ Yangon United​ ៣-១ និង​ប្រកួត​លើក​ទី​២​​ស្មើ​ក្រុម​កំពូល​តារាង Ha Noi FC ដែលស៊ីណាហ្គា១០គ្រាប់​ ដោយ​លទ្ធផល​ ១-១។

ចំពោះណាហ្គាវើល​វិញ កំពុង​ឈរ​លេខ​៣​​​ បន្ទាប់​ពី​ទទួល​បាន​៣​ពិន្ទុ​​តាម​រយៈ​ការ​ប្រកួត​ឈ្នះ​១​ និង​ចាញ់​១។ ប្រកួត​ទី​១​ ណាហ្គាវើល​បាន​ចាញ់​ក្រុម​ខ្លាំង​របស់​វៀតណាម​ Ha Noi ដោយ​លទ្ធផល​ ០-១០ ប៉ុន្តែ​រក​បាន​​៣​ពិន្ទុ​ការ​ប្រកួត​លើក​ទី​២​​​ដែល​បាន​យក​ឈ្នះ​ក្រុម​មីយ៉ាន់ម៉ា​ Yangon United ដោយ​លទ្ធផល​ ២-១ នៅ​ទឹក​ដី​ពហុកីឡដ្ឋាន​ជាតិ។

​ពូល​ជា​មួយ​គ្នា​នេះ​ ក្រុម​ខ្លាំង​កំពូល​តារាង​របស់​វៀតណាម​ Ha Nai ត្រូវ​​បើក​ទ្វារ​កីឡដ្ឋាន​ Hang Day ដើម្បី​​ស្វាគមន៍​ក្រុម​បាត​តារាង​មិន​ទាន់​មាន​ពិន្ទុ​ Yangon United។ នេះ​ជា​ឱកាស​ដែល​​ក្រុម​របស់​វៀតណាម​បន្ត​ឈរ​លើ​កំពូល​តារាង។

ការ​ប្រកួត​ល្ងាច​នេះ​នៅ​ពហុកីឡដ្ឋាន​ជាតិ​ សំបុត្រ​ចូល​ទស្សនា​​មាន​តម្លៃ​៥​ពាន់​រៀល​នៅតំបន់ VIP។ ចំណែកតំបន់ធម្មតាពុំអនុញ្ញាតិឲ្យមានអ្នកគាំទ្រចូលឡើយ។

 

 

 

 

ភ្ជាប់ទំនាក់ទំនងជាមួយ CTS SPORT