បិសាចក្រហម ត្រូវបានគេដឹងថាចង់បាន Coutinho របស់ FC Barcelona នារដូវក្ដៅខាងមុខនេះ ដើម្បីយកជួយតំបន់ប្រយុទ្ធរបស់ខ្លួន។
ទន្ទឹមនឹងការចង់បាននេះដែរ ខាងក្រុមអ្នកមានបុណ្យវិញ ក៏មានបំណងចង់បញ្ចេញខ្សែបម្រើប្រេស៊ីលរូបនេះដែរ បើទោះជាទើបទិញពី Liverpool មកជាង១០០លានផោនក៏ដោយ។ Barca មានបំណងយក Coutinho នេះ ដើម្បីជាផ្នែកមួយក្នុងការយកខ្សែប្រយុទ្ធវ័យក្មេង Rashford មកវិញ ហើយអាចនឹងបន្ថែមលុយទៀតឱ្យទៅបិសាចក្រហម។ មិនត្រឹមតែប៉ុណ្ណោះ ប្រសិនបើអាច Barcelona ក៏នឹងយក Malcom ម្នាក់ទៀតដើម្បីជាការចរចាយកកីឡាករឆ្នើមរបស់អង់គ្លេសម្នាក់នេះដែរ។
ក្រុមអ្នកមានបុណ្យ ចង់បាន Rashford នេះ កើតឡើង បន្ទាប់ពីកីឡាករវ័យ២១ឆ្នាំលេងបានយ៉ាងល្អទាំងក្រោមការដឹកនាំរបស់ Jose Mourinho និងលោក Ole។ អ្វីដែលពិសេសទៀតនោះ រូបគេក៏ជាអ្នករកគ្រាប់បាល់ជួយក្រុម Man Utd ឈ្នះ PSG ឡើងវគ្គ៨ក្រុមចុងក្រោយ UEFA Champions League ផងដែរ។ ត្បិតតែយ៉ាងនេះក្ដី ម្ចាស់ក្លឹបបិសាចក្រហម ធ្លាប់បានបញ្ជាក់ហើយថា ពួកគេនឹងមិនចាប់អារម្មណ៍ចំពោះការស្នើពីក្រុមណាទាំងអស់ ទាក់ទងនឹងការចង់បាន Rashford នេះ៕ប្រភព៖ Dailymail