ក្លឹប Bayern Munich បានប្រកាសពីការចុះហត្ថលេខាផ្លូវការជាមួយកីឡាកររបស់ក្រុម Atletico Madrid គឺ Lucas Hernandez នៅតម្លៃខ្លួន ៦៨ លានផោន។
ខ្សែការពារឆ្នើមដែលធ្លាប់ជួយឲ្យបារាំងឈ្នះពាន World Cup ២០១៨ រូបនេះ បានព្រមព្រៀងលើកុងត្រារយៈពេល ៥ ឆ្នាំជាមួយក្លឹបយក្សអាល្លឺម៉ង់ ដោយការបង្ហាញខ្លួនផ្លូវការនឹងធ្វើឡើងនារដូវកាលក្រោយ។
កីឡាករវ័យ ២៣ ឆ្នាំរូបនេះបានថ្លែងក្នុងសន្និសីទសារព័ត៌មានដូច្នោះថា៖ “ថ្ងៃនេះគឺជាថ្ងៃដ៏សំខាន់បំផុតមួយសម្រាប់អាជីពបាល់ទាត់របស់ខ្ញុំ ដោយ Bayern ជាក្លឹបល្អបំផុតមួយនៅអឺរ៉ុបនិងពិភពលោកទាំងមូល ហើយខ្ញុំមានមោទនភាពក្នុងការពុះពារស្វែងរកពានរង្វាន់សម្រាប់ក្រុម Bayern ទោថ្ងៃអនាគត”។
រំឭកថា Hernandez បានបង្ហាញខ្លួន ៦៧ លើកនៅក្របខ័ណ្ឌ LaLiga ដោយរកបាន ១ គ្រាប់។ សព្វថ្ងៃឈរនៅចំណាត់ថ្នាក់ទីពីរជាខ្សែការពារថ្លៃបំផុតក្នុងលោក បន្ទាប់ពី Virgil van Dijk របស់ក្លឹប Liverpool ដែលទិញចេញពី Southampton ក្នុងតម្លៃខ្លួន ៧៥ លានផោនកាលពីឆ្នាំទៅ។ ប្រភព: TalkSport