កន្លងទៅក្លឹប Real Madrid ធ្លាប់មានចចាមអារ៉ាមចុះផ្សាយថាពេញចិត្តលើខ្សែប្រយុទ្ធ Kylian Mbappe ជាខ្លាំង ដោយថ្មីៗនេះយោងតាមសារព័ត៌មាន El Chiringuito ក៏បានរាយការណ៍ថាបុរសវ័យ ២០ ឆ្នាំបានចរចាជាមួយអ្នកចាត់ការ Zinedine Zidane រួចជាស្រេច ហើយក៏បានទទូចស្នើប្រធានក្លឹបបារាំងលោក Nasser Al-Khelaifi ឲ្យអនុញ្ញាតឲ្យខ្លួនចាកចេញ។
ក្នុងលក្ខខណ្ឌនេះប្រភពបន្តថាក្រុមអធិរាជសចាំបាច់ត្រូវការកីឡាករ ២ រូបជាថ្នូរ ដោយអាចជា James Rodriguez និង Isco សម្រាប់បញ្ចុះបញ្ចូលឲ្យ PSG បើកភ្លើងខៀវ។
រំឭកថាកីឡាករសញ្ជាតិកូឡុំប៊ី (James) ហាក់មិនពេញចិត្តនឹងបន្តជើងនៅ Bayern Munich ឡើយ ហើយបន្ទាប់ពីផុតកុងត្រាខ្ចីជើងរូបគេក៏ពិបាកនឹងរកតំណែងលេងនៅ Real Madrid នោះដែរ បែបនេះការចាកចេញទៅកាន់ក្លឹបណាមួយអាចនឹងក្លាយជាជម្រើសល្អ។ ប្រភព: AS