ជាយូរមកហើយ ONE Championship បាននិងកំពុងផ្ដល់ឱកាសប្រកួតលក្ខណៈអន្តរជាតិដល់តារាកំពុងរះចិញ្ចែងចិញ្ចាចជាច្រើនរូបនាពេលបច្ចុប្បន្ន និងបន្តបំផុសទឹកចិត្តអ្នកហាត់ក្បាច់គុនក្មេងៗជាច្រើនផ្សេងទៀត។
រាប់ចាប់ពីជើងឯក ONE Atomweight World Champion ដែលមិនទាន់ស្គាល់ចាញ់ Angela Lee រហូតដល់ម្ចាស់ខ្សែក្រវាត់ពិភពលោកនារី២ខ្សែ Stamp Fairtex របស់ថៃ ឃើញថាស្ត្រីនៅក្នុងស្ថាប័ន ONE Championship បានជះឥទ្ធិពលដែលមិនអាចប្រកែកបានមកលើពិភពក្បាច់គុន ហើយកម្ពុជាកំពុងព្យាយាមដើរតាម។
ក្នុងរយៈពេល២ខែចុងក្រោយនេះ តារារះលឿនបំផុតរបស់កម្ពុជា ឯម សុវណ្ណារី និង នៅ ស្រីពៅ បានបោះជំហានឈានចូលក្នុងស្ថាប័នក្បាច់គុនធំបំផុតរបស់ពិភពលោកយ៉ាងកក្រើក។
សុវណ្ណារី កំពុងកាន់កាប់ស្ថិតិឈ្នះ៣ប្រកួតជាប់ៗគ្នា ខណៈ ស្រីពៅ បានចូលប្រកួតគុនចម្រុះលើកដំបូងក្នុងអាជីពកាលពីខែកុម្ភៈកន្លងទៅ ដោយត្រួតត្រាការវាយលើតារាដ៏ល្បីល្បាញរបស់ថៃ Rika “Tinydoll” Ishige ពេញ៣ទឹក។
កីឡាការិនីគុនចម្រុះកម្ពុជាមិនត្រឹមតែទទួលបានការលើកទឹកចិត្តពេញទំហឹងពីសំណាក់ប្រជាជនទូទាំងប្រទេសប៉ុណ្ណោះទេ សូម្បីអ្នករួមអាជីពនៅ ONE Championship ក៏រំភើបចំពោះអ្វីដែលពួកគេបាននាំមកសម្រាប់កម្ពុជាផងដែរ។
ជាក់ស្ដែង កីឡាករ រិន សារ័ត្ន របស់ក្លិប Cambodian Top Team និយាយថា៖ «ខ្ញុំរំភើបណាស់។ ខ្មែរយើងមិនសូវមានកីឡាការិនី MMA ទេពីមុនមក។ ទើបតែថ្មីៗនេះទេដែលយើងចាប់ផ្ដើមមាននារីដែលស្រលាញ់ MMA ច្រើនឡើងៗនិងព្យាយាមចូលហាត់ MMA»។
ចំណែកម្ចាស់ក្លិបសិល្បៈនិងជាកីឡាករគុនខ្មែរដ៏ល្បី ចាន់ រតនា ក៏យល់ស្របជាមួយ សារ័ត្ន ដែរ។
រតនា លើកឡើងថា៖ «បើមាននារីកាន់តែច្រើនចូលប្រឡូកក្នុងកីឡាប្រយុទ្ធនេះ វានឹងល្អសម្រាប់គ្រប់គ្នា»។
ទន្ទឹមនឹងនេះ រតនា ក៏មើលឃើញកំណើនប្រជាប្រិយភាពនៃវិស័យក្បាច់គុនក្នុងប្រទេសកម្ពុជាផងដែរ។
រតនា បញ្ជាក់ថា៖ «មិនត្រឹមតែនារីប៉ុណ្ណោះទេ តែជាទូទៅមនុស្សកាន់តែច្រើនបានចូលប្រឡូកក្នុងក្បាច់គុននិងកីឡាកផ្សេងៗ។ ស្ត្រីមានសិទ្ធិដូចបុរសដែរ។ មិនមែនតែបុរសទេដែលអាចលេងកីឡានិងរឹងមាំបាន តែនារីក៏អាចខ្លាំងនិងធ្វើបានដូចបុរសដែរ»។
ចំណែកតារាក្នុងកម្មវិធី ONE Warrior Series គឺ Emmanuel Onyedikachi បានបន្ទរពីភាពវិជ្ជមានដែលក្បាច់គុនជះឥទ្ធិពលលើជីវិតរស់នៅផងដែរ។
កីឡាករជនជាតិនីហ្សេរីយ៉ាដែលរស់នៅភ្នំពេញ និយាយថា៖ «ខ្ញុំគាំទ្រ១០០%និងផ្ដល់ដំបូន្មានដល់នារីៗឱ្យពិចារណាហាត់ក្បាច់គុន។ វាល្អសម្រាប់សុខភាពនិងជួយផ្លូវចិត្តទាំងបុរសនិងនារីឱ្យមានភាពរឹងមាំក្នុងការដោះស្រាយបញ្ហាជាក់ស្ដែងក្នុងជីវិត»៕
