Pique និង Xavi បានចូលលេងឱ្យក្រុមជម្រើសជាតិកាតាឡាន់ ដើម្បីត្រៀមប្រកួតជាមួយក្រុមវេណេហ្ស៊ុយអេឡា នៅសប្ដាហ៍ក្រោយ។
Pique និង Xavi បានចូលនិវត្តពីជម្រើសជាតិអេស្ប៉ាញហើយ ប៉ុន្តែពួកគេនៅលេងឱ្យជម្រើសជាតិកាតាឡាន់ដដែល។ ត្បិតតែ កាតាឡាន់ មិនទាន់ទទួលស្គាល់ដោយ FIFA និង UEFA មែន ប៉ុន្តែក្រុមមួយនេះអាចធ្វើការណាត់ប្រកួតមិត្តភាពជាមួយក្រុមប្រទេសដទៃទៀតបាន។ Pique និង Xavi នេះដែរ ក៏ជាកីឡាករដែលចង់ឱ្យតំបន់កាតាឡាន់នេះ ទទួលបានឯករាជ្យពីអេស្ប៉ាញដែរ។
តំបន់កាតាឡាន់ ជារៀងរាល់ឆ្នាំតែងតែធ្វើប្រជាមតិ ដើម្បីផ្ដាច់ខ្លួនពីអេស្ប៉ាញ និងប្រកាសឯករាជ្យដោយខ្លួនឯង។ នៅតំបន់នេះ ពោរពេញដោយរោងចក្រ សហគ្រាសធំៗ ដែលជាដង្ហើមមួយដែរសម្រាប់ប្រទេសអេស្ប៉ាញ ក្នុងការបង្កើនសេដ្ឋកិច្ច។ ហេតុដូច្នេះហើយ ទើបបានជាការទាមទារឯករាជ្យម្ដងណា ក៏អេស្ប៉ាញប្រកាសមិនព្រម រហូតថែមទាំងធ្លាប់ព្រមានពីការប្រើយោធាទៅលើតំបន់នេះទៀតផង។
ដោយឡែកសម្រាប់ Pique និង Xavi វិញ កាលនៅជាប់លេងឱ្យជម្រើសជាតិអេស្ប៉ាញ ក៏ទទួលបានការរិះគន់ច្រើនដែរ នៅពេលដែលពួកគេជាអ្នកគាំទ្រឱ្យមានការផ្ដាច់ខ្លួនរបស់តំបន់កាតាឡាន់នេះ៕
