ខ្សែប្រយុទ្ធវ័យក្មេង Vinicius Junior បានកកាយនឹកដល់រឿងចាស់អំឡុងការសម្រេចចិត្តមកលេងនៅក្លឹប Real Madrid ដំបូង ថាគ្រានោះក៏មានការចាប់អារម្មណ៍ពីក្លឹបយក្ស Barcelona ដូចគ្នា ប៉ុន្តែខ្លួនបដិសេធ។
កីឡាករវ័យ ១៨ ឆ្នាំបានផ្លាស់ចេញពីក្លឹបចាស់ Falamengo មកលេងឲ្យ Real Madrid ជាផ្លូវការកាលពីខែកក្កដា ឆ្នាំ ២០១៨។ រួបគេបានប្រាប់ Cadena SER ដូច្នោះថា៖ “ឪពុករបស់ខ្ញុំនិងខ្ញុំបានទៅដល់ក្លឹបទាំងពីរនោះផ្ទាល់ ហើយចូលចិត្តខ្លាំងមែនទែន ខណៈដែល Barcelona ចង់ផ្តល់ប្រាក់ឲ្យខ្ញុំច្រើនជាង ប៉ុន្តែខ្ញុំចង់បានគម្រោងការល្អនៅក្លឹប Real Madrid និង Marcelo ក៏ដូចជា Casemiro ជាអ្នកជួយជំរុញបន្ថែម”។
ជុំវិញបញ្ហារបួសកជើងនិងការណែនាំពីគ្រូថ្មី Zinedine Zidane កីឡាករសញ្ជាតិប្រេស៊ីលក៏លាន់មាត់សរសើរថាការនិយាយណែនាំរវាង Zidane និង Solari គឺខុសគ្នាឆ្ងាយ ព្រោះអ្នកចាត់ការសញ្ជាតិបារាំងធ្លាប់បានឈ្នះគ្រប់យ៉ាង ហើយក៏ប្រាប់ឲ្យរូបគេត្រជាក់ចិត្តដើម្បីត្រលប់មករកភាពរឹងមាំវិញ។ ប្រភព: BeSoccer