Sanchez ៖ ខ្ញុំ​ស្រលាញ់ Man Utd ​តាំង​ពី​តូច ​ឱ្យ​ស្បថ​ក៏​បាន​ដែរ​

Alexis Sanchez ​ថា​ខ្លួន​ជា​អ្នក​គាំទ្រ​និង​ស្រលាញ់​ក្រុម Manchester United ​តាំង​ពី​តូច​មក ​បើ​មិន​ជឿ​ស្បថ​ក៏​ហាន​ដែរ។Sanchez ​ជា​កីឡាករ​ក្រុម Man Utd ​ទិញ​ពី Arsenal ​កាល​ពី​ខែ​មករា​ឆ្នាំ​២០១៨​កន្លង​ទៅ ​ហើយ​ក្លាយ​ជា​ខ្សែ​ប្រយុទ្ធ​មាន​ប្រាក់​ប្រចាំ​សប្ដាហ៍​ច្រើន​ជាង​គេ​បំផុត​ក្នុង​ក្រុម រហូត​ដល់​៥​សែន​ផោន​ឯ​ណោះ។ ប៉ុន្តែ​បើ​មើល​លើ​លទ្ធផល​ដែល​រូបគេ​ជួយ​ក្រុម​វិញ ​នា​រដូវ​កាល​នេះ​មិន​កើត​ឡើយ ​ជាក់​ស្ដែង​លេង​៤១​ប្រកួត​មក​ហើយ ​រក​បាន​តែ​៥​គ្រាប់​ប៉ុណ្ណោះ។ កត្តា​នេះ​ហើយ ទើប​បាន​ជា​ក្រុម​បិសាច​ក្រហម កំពុង​ពិចារណា​ដាក់​ឱ្យ​គេ​ខ្ចី​ជើង​នៅ​រដូវ​កាល​ក្រោយ ឬ​លក់​ចេញ​តែ​ម្ដង។

ទន្ទឹម​គ្នា​នឹង​ពាក្យ​ចចាមអារ៉ាម​រឿង​លក់​ចេញ​នេះ​ដែរ សាមី​ខ្លួន Sanchez ​បាន​និយាយ​ថា​៖ “ខ្ញុំ​នៅ​តែ​ជឿ​ជាក់​ថា​ខ្ញុំ​នឹង​ជោគជ័យ​នៅ​ក្លឹប​នេះ ​ខ្ញុំ​ជឿ​លើ​​សមត្ថភាព​ខ្លួន​ឯង។ United ​ជា​ក្លឹប​សំខាន់ ​មិន​ត្រឹម​តែ​នៅ​អង់គ្លេស​ទេ ​តែ​ទូទាំង​ពិភព​លោក ​ហើយ​ខ្ញុំ​ចង់​ជួយ​ក្រុម​នេះ​ឱ្យ​ឈ្នះ​ពាន​ដើម្បី​អ្នក​គាំទ្រ។ ខ្ញុំ​ជា​អ្នក​គាំទ្រ United ​តាំង​ពី​តូច… ​ខ្ញុំ​ស្បថ ​កាល​ពី​ក្មេង​ខ្ញុំ​ចូល​ចិត្ត United ​ណាស់”៕

ប្រភព៖ DaiMail

ភ្ជាប់ទំនាក់ទំនងជាមួយ CTS SPORT