ក្រុម Chelsea នឹងត្រូវប៉ះជាមួយក្រុម Dynamo Kiev នៅម៉ោង១២:៥៥នាទីរំលងអាធ្រាត្រនេះ ក្នុងការប្រកួតជើងទី២ពានរង្វាន់ Europa League ។កាលពីជើងទី១កន្លងទៅ ក្រុមតោខៀវបានយកឈ្នះក្រុមមួយនេះបាន ៣-០ ម្ដងមកហើយ ដូច្នេះនៅរាត្រីនេះហាក់មិនសូវមានសម្ពាធឡើយសម្រាប់លោក Sarri ។ តែទោះជាយ៉ាងនេះក្ដី អ្នកចាត់ការអ៊ីតាលីរូបនេះ កំពុងបារម្ភទៅលើទីលានរបស់ក្រុម Dynamo ទៅវិញ ត្បិតអីទីលាននេះត្រូវបានក្រុម Chelsea គិតថាមិនត្រូវតាមស្ដង់ដារ និងអាចបណ្ដាលឱ្យកីឡាករមានរបួសបាន ប្រសិនបើលេងមិនប្រយ័ត្ន។
អ្នកចាត់ការខាងលើបានបន្ដថា៖ “ទីលាននេះ មិនល្អឡើយ។ វាពិតជាគ្រោះថ្នាក់ក្នុងការលេងបាល់ទាត់នៅលើទីលានបែបនេះ ខ្ញុំគិតថានឹងងាយបំផុតក្នុងការបង្កឱ្យកីឡាកររបួស។ ខ្ញុំមិនដឹងថាហេតុអ្វីទីលាននេះ ទៅជាបែបនេះទេ ប្រហែលមកពីរដូវរងាហើយ។ ខ្ញុំធ្លាប់មកប្រកួតនៅទីនេះ ២ឆ្នាំមុន កីឡដ្ឋាននេះពិតជាស្រស់ស្អាតខ្លាំងណាស់”។ ជាមួយអ្នកចាត់ការដែរ កីឡាករ Willian ក៏បញ្ជាក់ដែរថាកីឡាករទាំងអស់ត្រូវលេងប្រុងប្រយ័ត្នខ្ពស់ បើមិនចង់របួសទេនោះ។
ការប្រកួតរវាងក្រុមទាំងពីរ ត្រូវបានធ្វើឡើងនៅកីឡដ្ឋានជាតិអូឡាំពិកក្នុងទីក្រុងគៀវ ដែលផ្ទុកអ្នកគាំទ្របាន៧ម៉ឺននាក់។ វាជាកីឡដ្ឋានធំបំផុតទី២ នៅអឺរ៉ុបខាងកើត បន្ទាប់ពីកីឡដ្ឋាន Luzhniki របស់ក្រុងម៉ូស្គូវ។ នៅឆ្នាំ១៩៧៧ កីឡដ្ឋានរបស់ប្រទេសអ៊ុយក្រែនមួយនេះ បានផ្ទុកមនុស្សដល់១សែននាក់ ក្នុងការប្រកួតរវាងក្រុម Dynamo Kyiv ប៉ះ Bayern Munich ៕ប្រភព៖ Dailymail