• ម្ចាស់​ក្លឹប Chelsea ​មិន​លក់​ក្លឹប​នេះ​ឱ្យ​នរណា​ឡើយ ​ទោះ​ឱ្យ​ប៉ុន្មាន​ក៏​ដោយ

    លោក Roman Abramovich ​បាន​ប្រកាស​ថា​មិន​លក់​ក្លឹប Chelsea ​ឱ្យ​ទៅ​សេដ្ឋី​ណា​​ឡើយ ​បើ​ទោះ​ជា​ឱ្យ​តម្លៃ​ខ្ពស់​យ៉ាង​ណា​ក្ដី។

    បន្ទាប់​ពី​លោក Roman ​មាន​បញ្ហា​ VISA ​មិន​អាច​ចូល​អង់គ្លេស​បាន ​មាន​សេដ្ឋី​ជា​ច្រើន​បាន​ទាក់ទង​សុំ​ទិញ​ក្លឹប Chelsea ​ពី​លោក។ ដោយ​ក្នុង​នោះ​លោក Jim Ratcliffe ​មហា​សេដ្ឋី​ម្នាក់​នៅ​អង់គ្លេស ​បាន​ដាក់​តម្លៃ​ទិញ​ដល់​១​ពាន់​លាន​ផោន​ឯ​ណោះ។ ត្បិត​តែ​តម្លៃ​ខ្ពស់​យ៉ាង​នេះ​ក្ដី ប៉ុន្តែ​លោក Roman ​បាន​ច្រាន​ចោល​សំណើ​នេះ ​ហើយ​ប្រាប់​ទៅ​លោក Jim ​វិញ​ថា Chelsea ​មិន​មែន​សម្រាប់​លក់​ឡើយ។

    លោក Jim ​ជា​សេដ្ឋី​ល្បី​ឈ្មោះ​នៅ​អង់គ្លេស ​លោក​មាន​ទ្រព្យ​សម្បត្តិ​២១​ពាន់​លាន​ផោន ​ច្រើន​ជាង​លោក Roman ​ដែល​មាន​ត្រឹម​តែ​១១, ៧​ពាន់​លាន​ផោន​ប៉ុណ្ណោះ។ មួយ​វិញ​ទៀត​លោក Jim ​មាន​ក្រុមហ៊ុន​ធំ​ៗ​ជា​ច្រើន ​ដោយ​ភាគហ៊ុន​របស់​លោក​មាន​តម្លៃ​៤៥​ពាន់​លាន​ផោន ​និង​មាន​បុគ្គលិក​ច្រើន​ជាង ១៨ ៥០០​នាក់ ​ក្នុង​២២​ប្រទេស​ទូទាំង​ពិភព​លោក។ ​កាល​ពី​ប៉ុន្មាន​ខែ​មុន ​បុរស​រូប​នេះ​បាន​ទិញ​ក្លឹប FC Lausanne-Sport ​នៅ​ស្វីស​១​ហើយ ​ប៉ុន្តែ​មិន​បង្ហាញ​តម្លៃ​ឡើយ។

    បើ​និយាយ​ពី​លោក Roman ​វិញ ​បាន​ទិញ​ក្លឹប Chelsea ​នៅ​ឆ្នាំ​២០០៣ ​គ្រា​នោះ​តម្លៃ​ត្រឹម​តែ​១៤០​លាន​ផោន​ប៉ុណ្ណោះ។ ទិញ​បាន​ភ្លាម ​សេដ្ឋី​រុស្ស៊ី​រូប​នេះ ​បាន​ចំណាយ​ប្រាក់​ជា​ច្រើន​លាន​ផោន​ទៀត ​ដើម្បី​អភិវឌ្ឍន៍​ក្លឹប​ឱ្យ​ល្បី​ឈ្មោះ​ដូច​​បច្ចុប្បន្ន​នេះ៕ប្រភព៖ DailyMail

     

     

    ភ្ជាប់ទំនាក់ទំនងជាមួយ CTS SPORT