Cristiano Ronaldo ស៊ុតបាន៣គ្រាប់ម្នាក់ឯង ជួយ Juventus ទម្លាក់ក្រុម Atletico Madrid ជាថ្មីម្ដងទៀតក្នុងការប្រកួត UEFA Champions League បើទោះជាជើងទី១ បានចាញ់ដល់ ២-០ក៏ដោយ។
បរាជ័យជើងទី១ ក្នុងលទ្ធផល ២-០ បានធ្វើឱ្យក្រុម Juventus សឹងតែគ្មានសង្ឃឹមក្នុងការវាយបកឈ្នះក្រុម AT Madrid វិញទេ ព្រោះថាក្រុមមួយនេះល្បីពូកែលេងការពារខ្លាំងណាស់។ ប៉ុន្តែជាក់ស្ដែងក្នុងការប្រកួតមកដល់ សេះបង្កង់ដែលមាន Ronaldo លេងនៅតំបន់ប្រយុទ្ធនោះ បានសម្រុកស៊ុតរហូតបាន៣គ្រាប់វិញ យកឈ្នះឡើងទៅវគ្គបានសម្រេច។ ការស៊ុតបាន Hat-trick របស់ Ronaldo នេះដែរ ធ្វើឱ្យកក្រើកពិភពលោកតែម្ដងនៅថ្ងៃនេះ។
យ៉ាងណាមិញ Ronaldo យប់មិញ គេឃើញថាបានបង្ហាញក្បាច់អបអរឌឺដងដល់លោក Simeone អ្នកចាត់ការក្រុម AT Madrid វិញផងដែរ។ រំលឹកទៅក្រោយវិញ បន្តិចនៅជើងទី១កន្លងទៅ ពេលក្រុម AT Madrid ឈ្នះបាន ២-០ អ្នកចាត់ការរបស់ពួកគេបានអបអរក្បាច់យកដៃក្ដោបប្រដាល់ភេទខ្លួនឯង។ ហើយយប់មិញនេះ Ronaldo ក៏បានអបអរក្បាច់នោះវិញដែរ ដើម្បីជាការសងសឹកវិញ។ នេះជាការរកបាន Hat-trick ៨ដងនៅ Champions League របស់ Ronaldo និងជាកំណត់ត្រាស្មើជាមួយ Messi ផងដែរ៕ប្រភព៖ Dailymail
