កីឡាការិនីក្លិប Cambodian Top Team នៅ ស្រីពៅ កើនឡើងប្រជាប្រិយភាពយ៉ាងលឿនរហ័សមែនទែន បន្ទាប់ពីបញ្ចប់ឆ្នាំ២០១៨ក្នុងនាមជាជ័យលាភី Female Fighter of the Year របស់ស្ថាប័ន World Lethwei Championship និងឈ្នះជើងឯកគុនខ្មែរក្នុងប្រទេសកម្ពុជា។ទោះបីសម្រេចបានសមិទ្ធផលដ៏គួរឱ្យភ្ញាក់ផ្អើលទាំងនេះរួចហើយក្ដី កីឡាការិនីវ័យ២៤ឆ្នាំបានបន្តធ្វើបានល្អលើសក្ដីរំពឹងទុកថែមទៀតខែមុន នៅពេលនាងឡើងប្រកួតគុនចម្រុះលើកទី១ ហើយបានផ្ដួលកំពូលតារាថៃកាត់ជប៉ុន Rika “Tinydoll” Ishige នៅ ONE: CLASH OF LEGENDS ក្នុងរាជធានីបាងកក។ឥឡូវនេះ ស្រីពៅ ត្រូវបានចាត់ទុកជាវីរនារីម្នាក់របស់កម្ពុជាក្នុងវិស័យក្បាច់គុន ហើយនាងកំពុងបន្តអភិវឌ្ឍខ្លួនបន្ថែមទៀតឱ្យកាន់តែខ្លាំងក្នុងអាជីពមួយនេះ ដោយចង់ប្រកួតជាមួយអ្នកខ្លាំងៗជាងមុនថែមទៀតនៅក្រៅប្រទេស។ស្រីពៅ ពន្យល់ថា៖ «នៅស្រុកខ្មែរមានកីឡាការិនីតិចតួចណាស់ ដូច្នេះខ្ញុំគ្មានអ្នកដែលខ្ញុំពិតជាចង់ប្រកួតជាមួយទេនៅទីនេះ»។
ថ្វីបើបានទទួលស្គាល់ថាសមត្ថភាពរបស់ខ្លួនមិនទាន់បានពាក់កណ្ដាលម្ចាស់ខ្សែក្រវាត់ ONE Super Series Atomweight Kickboxing និង ONE Muay Thai World Champion ជនជាតិថៃ Stamp Fairtex មែនពិត តែ ស្រីពៅ បានបង្ហើបពីចំណាប់អារម្មណ៍របស់ខ្លួនក្នុងការល្បងសមត្ថភាពជាក់ស្ដែងជាមួយកំពូលកីឡាការិនីថៃរូបនេះ។ តែប្រសិនជំនួបនេះមិនកើតឡើងទេ ស្រីពៅ នៅមានជម្រើសផ្សេងទៀតជាច្រើន។កីឡាការិនីជម្រើសជាតិសកលរបស់កម្ពុជាបន្តថា៖ «ឆ្នាំនេះខ្ញុំប្រហែលមិនប្រកួតគុនខ្មែរទេ ព្រោះខ្ញុំជាជម្រើសជាតិប្រដាល់សកល។ ដូច្នេះខ្ញុំត្រូវផ្អាកការហ្វឹកហាត់គុនខ្មែរមួយរយៈដើម្បីផ្ដោតលើប្រដាល់សកលសម្រាប់ប្រកួត SEA Games 2019 នៅហ្វ៊ីលីពីនក្នុងខែវិច្ឆិកាខាងមុខ»។ស្រីពៅ បន្ថែមថា៖ «កាលមុនខ្ញុំរកសង្វៀនវ៉ៃមិនបានទេ ហើយខ្ញុំគិតចង់ឈប់ពីប្រដាល់។ នៅក្នុងស្រុកខ្មែរមិនសូវមានកីឡាការិនីទេ ហើយសឹងតែមិនមានការគាំទ្រការប្រកួតរបស់កីឡាការិនី។ ប៉ុន្តែឥឡូវលោកគ្រូ ហ៊ុន ចាន់រាជ្យ រកបានឱកាសថ្មីសម្រាប់ខ្ញុំ។ ខ្ញុំរំភើបខ្លាំងមែនទែន។ ខ្ញុំសប្បាយចិត្តខ្លាំងណាស់។ ខ្ញុំលែងចង់ឈប់ហើយ ហើយខ្ញុំនឹងខំហាត់ឱ្យខ្លាំងជាងនេះទ្វេដង»។
ដើម្បីត្រៀមខ្លួនឱ្យរួចរាល់សម្រាប់ការប្រកួតដែលអាចកើតឡើងនៅពេលខាងមុខ ស្រីពៅ រាល់ថ្ងៃនេះកំពុងប្រឹងប្រែងហ្វឹកហាត់យ៉ាងស្វាហាប់ដោយមិនខ្លាចនឿយហត់ និងទទួលបានការគាំទ្រយ៉ាងច្រើន។ស្រីពៅ បញ្ជាក់ចុងក្រោយថា៖ «ខ្ញុំហាត់រាល់ថ្ងៃ។ ខ្ញុំហាត់ប្រដាល់សកលនៅអូឡាំពិក តែបើខ្ញុំត្រូវទៅប្រកួត MMA ខ្ញុំនឹងហាត់ត្រៀមនៅក្លិប Cambodian Top Team។ ឥឡូវនេះខ្ញុំមានអ្នកគាំទ្រច្រើនណាស់។ ខ្ញុំលើសពីសប្បាយចិត្ត។ បន្ទាប់ពីខ្ញុំប្រកួតនៅបាងកករួច មានមនុស្សច្រើនណាស់បានផ្ញើសារមកខ្ញុំហើយហៅខ្ញុំថា[វីរនារីកម្ពុជា]។ គ្រួសាររបស់ខ្ញុំនិងខ្លួនខ្ញុំផ្ទាល់រំភើបចិត្តខ្លាំងមែនទែន»៕
