ថ្វីបើមានបណ្តុំកីឡាករកំពូលមួយចំនួនធំស្ថិតក្នុងក្រុមរបស់ខ្លួន ប៉ុន្តែ Paris Saint-Germain នៅតែមិនអាចស្តារមុខមាត់សម្រាប់ការប្រកួត Champions League រដូវកាល ២០១៨/១៩ នេះ។ បរាជ័យដ៏មិនគួរឲ្យជឿ ក្រោមថ្វីជើង Manchester United បានរំអុកឲ្យក្រុមអ្នកមានបារាំងកាន់តែមួម៉ៅខ្លាំង និងគិតចង់វ៉ៃចេញកីឡាករខ្លះនាទីផ្សារដោះដូររដូវក្តៅខាងមុខ។
យោងតាមសារព័ត៌មានបារាំង L’Equipe បានឲ្យដឹងថាទ្វារកំពុងបើកចាំហើយស្រេច ដើម្បីឲ្យកីឡាករ ៣ រូបចាកចេញក្នុងពេលដ៏ខ្លីខាងមុខ ដោយរួមមាន Jese Rodriguez, Thomas Meunier និង Christopher Nkunku។ សម្រាប់ Jese បច្ចុប្បន្នដាក់ឲ្យខ្ចីជើងទៅក្លឹប Betis ប៉ុន្តែ PSG ក៏មានគម្រោងជជែកដើម្បីលក់ផ្តាច់ទៅក្រុមអេស្ប៉ាញក្នុងតម្លៃ ៨០ លានអឺរ៉ូ។
ប្រភពដដែលបន្តថាក្នុងនោះក៏មានកីឡាករធុនធ្ងន់ ២ រូបរួមមាន Edinson Cavani និង Angel di Maria។ ប៉ុន្តែសម្រាប់ខ្សែប្រយុទ្ធសញ្ជាតិអ៊ុយរុយហ្គាយអាចនឹងត្រូវចរចាតានតឹងបន្តិច ព្រោះកន្លងមកធ្លាប់តែជាអ្នករកគ្រាប់បាល់បានច្រើនបំផុតឲ្យក្លឹប ស្រដៀងនឹងខ្សែប្រយុទ្ធស្លាបអាហ្សង់ទីនក៏ធ្វើបានល្អគួរសម។ ប្រភព: AS