កីឡា​ការិនី​ម្នាក់ ​ចូល​ហ្វឹកហាត់ ទាំង​ខ្លួន​មាន​ទម្ងន់​៦​ខែ​ទៅ​ហើយ​

Sydney Leroux ​កីឡា​ការិនី​របស់​ក្រុម Orlando Pride ​បាន​ចូល​ហ្វឹកហាត់​ជាមួយ​ក្រុម​ត្រៀម​រដូវ​កាល​ថ្មី ​ត្បិត​អី​នាង​កំពុង​ព​ពោះ​៦​ខែ​ទៅ​ហើយ​ក្ដី។

ការ​ចូល​ហ្វឹកហាត់​ជាមួយ​ក្រុម​ទាំង​ដែល​ខ្លួន​កំពុង​មាន​ផ្ទៃ​ពោះ​នេះ​ដែរ ​កំពុង​តែ​ធ្វើ​ឱ្យ​កក្រើក​ក្នុង​បណ្ដាញ​សង្គម​តែ​ម្ដង។ ​Sydney ​វ័យ​២៨​ឆ្នាំ​បាន​និយាយ​ចំពោះ​ទង្វើ​របស់​ខ្លួន​នេះ​ថា​៖ “ខ្ញុំ​មិន​គិត​ថា​ខ្ញុំ​នឹង​ត្រូវ​សម្រាក​ពេល​មាន​ផ្ទៃ​ពោះ​ប៉ុណ្ណឹង​ទេ។ ខ្ញុំ​គ្រាន់​តែ​ហ្វឹកហាត់​ធម្មតា ​មិន​ឱ្យ​មាន​ការ​ប៉ះ​ទង្គិច​ខ្លាំង​ឡើយ”។ ការ​ហ្វឹកហាត់​ទាំង​ខ្លួន​មាន​ផ្ទៃ​ពោះ​នេះ ​បាន​ធ្វើ​ឱ្យ​នារី​ជា​ច្រើន​មាន​មោទនភាព​ចំពោះ​កីឡា​ការិនី​នេះ​ខ្លាំង​ណាស់។

នារី​ដែល​កើត​នៅ​កាណាដា ​ប៉ុន្តែ​លេង​ឱ្យ​ជម្រើស​ជាតិ​នារី​អាមេរិក​ខាង​លើ​នេះ ​អាច​ចាត់​ទុក​ជា​វីរ​នារី​បាល់ទាត់​ស្ត្រី​ម្នាក់​បាន ព្រោះ​នាង​បង្ហាញ​ខ្លួន​ក្នុង​ជម្រើស​ជាតិ​អាមេរិក​៧៧​ប្រកួត ​រក​បាន​៣៥​គ្រាប់។ ​ជួយ​ក្រុម​ជម្រើស​ជាតិ​នេះ ​ឈ្នះ​ពាន​ World Cup ​កាល​ពី​ឆ្នាំ​២០១៥ ​និង​ឈ្នះ​មេដាយ​មាស​អូឡាំពិក​នៅ​ឆ្នាំ ២០១២​ផង​ដែរ៕ប្រភព៖ Dailymail

ភ្ជាប់ទំនាក់ទំនងជាមួយ CTS SPORT