ខ្សែបម្រើ Luka Modric បាននិយាយថាក្រុម Real Madrid បច្ចុប្បន្ននេះ កំពុងនឹកដល់ Cristiano Ronaldo ហើយ ដែលជាខ្សែប្រយុទ្ធមួយរូបគ្មាននរណាអាចជំនួសបាន។
នៅរាត្រីនេះ ក្រុម Real Madrid នឹងបើកកីឡដ្ឋានរបស់ខ្លួនស្វាគមន៍ក្រុមភ្ញៀវ Ajax ក្នុងជើងទី២ ពានរង្វាន់ UEFA Champions League ។ ខណៈដែលជើងទី១កន្លងទៅ ក្រុមអធិរាជសបានយកឈ្នះក្នុងលទ្ធផល ២-១ ហើយ។ តែទោះជាយ៉ាងនេះក្ដី នៅរាត្រីនេះ ក្រុម Real Madrid នឹងមិនមានវត្តមានរបស់ប្រធានក្រុម Sergio Ramos ឡើយ ដែលធ្វើឱ្យក្រុម Ajax អាចមានសង្ឃឹមឡើងវិញ។
ម្ចាស់ពាន Ballon d’Or ឆ្នាំ២០១៨ Luka Modric បាននិយាយមុនការប្រកួតនេះថា៖ “អវត្តមាន Cristiano គឺមានអ្វីម្យ៉ាងដែលគ្រប់ក្រុមទាំងអស់កំពុងមានអារម្មណ៍។ រកអ្នកជំនួសគេ គឺជារឿងស្ទើរមិនអាចទៅរួចទៅហើយ។ អ្វីដែលគាត់បានផ្ដល់ឱ្យក្រុមរបស់យើង។ យើងនឹក Cristiano ។ ក្លឹបបានព្យាយាមរកកីឡាករមកជំនួសកន្លែងរបស់គាត់ ប៉ុន្តែមិនមែនជារឿងងាយស្រួលឡើយ។ គាត់ស៊ុត១រដូវកាលបាន៥០គ្រាប់ បច្ចុប្បន្នមិនងាយមានកីឡាករណាធ្វើបានទេ”៕ប្រភព៖ Dailymail
