ស្ថិតក្នុងវ័យ ៤១ ឆ្នាំអ្នកចាំទីចាស់វស្សា Gianluigi Buffon នៅតែបន្តអាជីពក្នុងកីឡាបាល់ទាត់នៅក្លឹប Paris Saint-Germain។ ប៉ុន្តែជីកកកាយដល់រឿងរ៉ាវអតីតកាល អតីតជើងចាស់នៅ Juventus បានបង្ហើបថាមានតាំងពីក្លឹប Manchester United និង Manchester City ធ្លាប់ចាប់អារម្មណ៍ចង់បានរូបលោក។
ប្រាប់សារព័ត៌មាន BT Sport លោកនិយាយថា៖ “ពេលខ្ញុំនៅក្មេងអំឡុងលេងឲ្យក្លឹប Parma គ្រានោះលោក Sir Alex Ferguson តាមមើលខ្ញុំមិនដាក់ភ្នែកអស់ពេល ២ ឬ ៣ ឆ្នាំ ហើយជាញឹកញយលោកតែងតែបញ្ជូនគេមកឲ្យឃ្លាំមើលការលេងរបស់ខ្ញុំ ប៉ុន្តែគ្រានោះក្នុងចិត្តគិតហើយថា Parma ជាពិភពលោករបស់ខ្ញុំ ដោយគ្មានចិត្តចង់ចាកចេញទេ”។
កីឡាករសញ្ជាតិអ៊ីតាលីបន្តប្រាប់ថា៖ “ក្រោយមកក៏ទទួលបានសំណើធំមួយពីក្លឹប Manchester City គ្រាដែលពួកគេចាប់ផ្តើមកសាងក្រុមទាំងមូលឲ្យក្លាយជាក្រុមខ្លាំងមួយនៅអឺរ៉ុប ហើយចង់បានខ្ញុំឲ្យចុះហត្ថលេខាមុនគេ ប៉ុន្តែខ្ញុំនៅបន្តឈរជើងឲ្យ Juventus”។
រំឭកដែរថា Buffon បានចាកចេញពី Juventus កាលពីរដូវក្តៅ ផ្លាស់ទៅលេងឲ្យ PSG ដោយគ្មានតម្លៃខ្លួន ក្រោយចាយពេល ១៧ ឆ្នាំស្មើ ៥០៩ ប្រកួតនៅទ្រនំចាស់នៃទឹកដី Turin។ ប្រភព: SportBible