សិស្សគុនក្លិប Cambodian Top Team (CTT) រិន សារ័ត្ន មានការលះបង់ខ្ពស់ចំពោះជំនាញរបស់គេនិងហ៊ានធ្វើដំណើរឆ្ងាយដើម្បីសម្រេចគោលដៅរបស់ខ្លួន ទោះបីជាត្រូវឃ្លាតពីគ្រួសារនិងប្រទេសកំណើតរបស់គេក៏ដោយ ដើម្បីត្រៀមខ្លួនមុនការប្រកួត ONE Championship លើកបន្ទាប់របស់គេ។
កីឡាករដែលមានមូលដ្ឋាននៅភ្នំពេញវ័យ២៥ឆ្នាំនឹងប្រកួតទល់នឹងសិស្សប្អូនរបស់ម្ចាស់ជើងឯក ONE Middleweight & Lightweight Heavyweight World Champion: Aung La N Sang គឺកីឡាករជំនោរថ្មី Tial “The Dragon Leg” Thang នៅ ONE: REIGN OF VALOR នាថ្ងៃសុក្រទី៨ខែមីនា។
ការប្រកួតទម្ងន់៦៨គីឡូក្រាមនេះនឹងបញ្ជាក់ឱ្យឃើញថាតើ Thang មានលក្ខណៈសម្បត្តិគ្រប់គ្រាន់ដើម្បីតតាំងជាមួយអ្នកប្រយុទ្ធដ៏មានបទពិសោធម្នាក់ឬទេ។ សម្រាប់ សារ័ត្នវិញ វានឹងជារង្វាស់រង្វាល់ល្អឥតខ្ចោះមួយដើម្បីបង្ហាញថាតើគេរីកចម្រើនសមត្ថភាពបានកម្រិតណាដែរតាំងពីឡើងប្រកួតលើកចុងក្រោយបង្អស់មក។
តាំងពីពាក់កណ្ដាលខែកុម្ភៈមក សារ័ត្ន បានស្ថិតក្នុងជំរំហ្វឹកហាត់ពេញៗម៉ោងនៅ Yorky Mixed Martial Arts ក្នុងរាជធានីបាងកក ដឹកនាំដោយអតីតអត្តពលិករបស់ ONE Championship ដែលបានក្លាយខ្លួនជាគ្រូបង្ហាត់ Nicholas “JJ” Lee។
Lee ពន្យល់ថា៖ «ពួកយើងបានជួបគ្នាលើកដំបូងនៅពេលសារ័ត្នប្រកួតលើកចុងក្រោយនៅបាងកក។ ខ្ញុំបានចំណាយពេលពីរបីថ្ងៃធ្វើការជាមួយគាត់មុនការប្រកួត រួចហើយពួកយើងមានទំនាក់ទំនងអស្ចារ្យជាមួយគ្នាយ៉ាងឆាប់រហ័ស»។
Lee ធ្វើការប្រចាំថ្ងៃជាមួយអត្តពលិកលំដាប់កំពូលៗដូចជាតារា ONE Warrior Series: Rockie Bactol និងមើលឃើញ សារ័ត្ន ជាអត្តពលិកមានលក្ខណៈពិសេសដែលកំពុងឆ្ពោះទៅរកភាពអស្ចារ្យក្នុងវិស័យក្បាច់គុន។
«គាត់មានទេពកោសល្យធំធេងក្រៃលែង គាត់ដាក់ខ្លួនណាស់ គាត់ហ៊ានលះបង់ និងខំប្រឹងហ្វឹកហាត់យ៉ាងខ្លាំងក្លា»។
«គាត់ឆាប់ចាប់បានមែនទែន។ លើសពីនេះ គាត់ថែមទាំងមានកម្លាំងខ្លាំងនិងរឹងមាំណាស់។ ខ្ញុំរកពាក្យល្អៗមកបរិយាយពីគាត់មិនអស់ទេ។ វាពិបាកពន្យល់ ប៉ុន្តែខ្ញុំមើលឃើញកត្តាដ៏ពិសេសក្នុងខ្លួនគាត់»។
នៅពេលត្រូវបានសួរអំពីឆ្នាំ២០១៩ អ្នកដឹកនាំក្លិប Yorky Mixed Martial Arts ទម្លាយថាលោកគ្រោងវិនិយោគពេលវេលាបន្ថែមទៀតនៅកម្ពុជា បន្ទាប់ពីបានចំណាយពេលពីរខែនៅទីនោះ។
Lee និយាយថាលោកមើលឃើញសក្ដានុពលធំក្នុងភាពរីកចម្រើននៃគុនចម្រុះកម្ពុជា ជាអ្វីដែលកូនសិស្សរបស់លោកម្នាក់ទៀតបានបង្ហាញសមត្ថភាពយ៉ាងពិសេសថ្មីៗនេះ។
ទាំង Lee និង សារ័ត្ន បានបង្ហាញវត្តមាននៅ ONE: CLASH OF LEGENDS នៅពេល នៅ ស្រីពៅ ផ្ដួលតារាសំណព្វចិត្តរបស់ម្ចាស់ផ្ទះ Rika Ishige។
ក្នុងពេលអនាគត “JJ” សង្ឃឹមថាអត្តពលិកជនជាតិកម្ពុជារបស់លោកនឹងមិនចាំបាច់ធ្វើដំណើរទៅប្រទេសថៃដើម្បីត្រៀមខ្លួនសម្រាប់ការប្រកួតទៀតទេ។
«នៅទីនេះ សារ័ត្ន មានដៃគូហ្វឹកហាត់ជាអត្តពលិកអាជីពពេញម៉ោងនានាដែលប្រកួតក្នុង ONE Championship ដែរនិងនៅស្ថាប័នធំៗផ្សេងទៀត។ នៅភ្នំពេញ វាពិបាកជាង ព្រោះ MMA កំពុងរីកចម្រើនបន្តិចម្ដងៗ ដូច្នេះសារ័ត្នមិនអាចទទួលបានដៃគូហ្វឹកហាត់ដែលមានកម្រិតខ្ពស់នៅទីនោះឡើយ»។
«គុនចម្រុះកម្ពុជាកំពុងរីកចម្រើន ប៉ុន្តែវាមិនទាន់ទៅដល់ចំណុចមួយនោះនៅឡើយទេ»។
ពាក់ព័ន្ធនឹងគូប្រកួតបន្ទាប់របស់សារ័ត្នវិញ Lee មានអារម្មណ៍ថា សារ័ត្ន មានប្រៀបច្រើនចំណុចណាស់។
«មានប្រៀបជាងទាំងចង្វាក់បេះដូង ភាពស្ទាត់ជំនាញ ល្បឿន និង កែង» Lee បញ្ជាក់។
«នរណាក៏ដឹងដែរថា Tial Thang នឹងព្យាយាមចាប់ផ្ដួលសារ័ត្ន ហើយគាត់ក៏បានដឹងដែរថាពួកយើងបាននិងកំពុងហាត់របៀបការពារខ្លួនពីការចាប់ផ្ដួលនោះ។ វានឹងជាការប្រកួតកម្រិតខ្ពស់មួយទៀតរវាងកីឡាករពូកែវាយចេញទល់នឹងកីឡាករពូកែចាប់ក្លេ»។
Lee មានទំនុកចិត្តក្នុងការត្រៀមលក្ខណៈរបស់សារ័ត្ន ហើយលោកនឹងនៅឱ្យទឹកសារ័ត្នជាមួយអ្នកដឹកនាំក្លិប CTT ហ៊ុន ចាន់រាជ្យ នៅ ONE: REIGN OF VALOR នាថ្ងៃទី៨ខែមីនា។
Lee បញ្ជាក់ចុងក្រោយថា៖ «ពួកយើងជិតមានរឿងល្អមួយហើយ»៕
