លោក Jurgen Klopp មានទំនុកចិត្តខ្ពស់ថាលោក Ole Gunnar Solskjaer នឹងក្លាយជាអ្នកចាត់ការផ្លូវការរបស់ក្លឹប Manchester United ជាមិនខាននៅរដូវកាលក្រោយ។
ក្រុម Liverpool នឹងធ្វើដំណើរទៅលេងនៅទឹកដី Old Trafford នាថ្ងៃអាទិត្យស្អែកនេះ ដើម្បីដណ្ដើមយក៣ពិន្ទុ។ គេនៅចាំបានថាកាលពីជើងទី១កន្លងទៅ នៅទឹកដីរបស់ Liverpool ក្រុម Man Utd បានបរាជ័យ ដែលគ្រានោះក្រុមបិសាចក្រហមស្ថិតនៅក្រោមការដឹកនាំរបស់លោក Jose Mourinho ។ កត្ដាចាញ់១ប្រកួតនេះហើយ ទើបបានជាតំណែងរបស់លោក Jose ត្រូវបាត់បង់តែម្ដង។
យ៉ាងណាមិញ ជួបគ្នាលើកទី២នេះ លោក Klopp ជឿជាក់ថានឹងស្វិតស្វាញជាងប្រកួតមុនទៅទៀត។ ជាក់ស្ដែង ក្រុម Man Utd កំពុងស្ថិតនៅក្រោមការដឹកនាំអ្នកចាត់ការថ្មី ដែលក្រុមទាំងមូលមានភាពខុសប្លែកពីក្រុមលើកមុនឆ្ងាយណាស់។ ជាក់ស្ដែង១៣ប្រកួតកន្លងមក ក្រោមការដឹកនាំរបស់លោក Solskjaer គឺក្រុម Man Utd ឈ្នះ១១ដង ស្មើ១ដងនិងចាញ់១ដង។
ធ្វើបានល្អយ៉ាងនេះហើយ ទើបបានជា Klopp យល់ឃើញថា វាគឺជារឿងមិនអាចទៅរួចឡើយ ក្នុងការដែលថ្នាក់ដឹកនាំក្រុម Man Utd ទៅរកអ្នកចាត់ការផ្សេង មិនយក Solskjaer ធ្វើជាអ្នកចាត់ការផ្លូវការនោះ៕