ក្រុមកាំភ្លើងធំ Arsenal បានវាយបកយកឈ្នះ BATE ៣-០ វិញនៅជើងទី២ ដើម្បីឡើងទៅវគ្គ១៦ក្រុម ក្រោយពីចាញ់ ១-០ កាលពីជើងទី១កន្លងទៅ។
ក្នុងការប្រកួតនោះដែរ គេសង្កេតឃើញថាលោក Emery បានដាក់ខ្សែបម្រើប្រយុទ្ធ Mesut Ozil ឱ្យចូលលេងក្នុងទីលានវិញហើយ ក្រោយពីមិនប្រើប្រាស់រូបគេជាច្រើនប្រកួតកន្លងមក។ ក្នុងការលេងនោះដែរ កីឡាករពាក់អាវលេខ១០នេះ បានជួយក្រុមច្រើននៅតំបន់ប្រយុទ្ធនិងទទួលបានការសរសើរពីអ្នកចាត់ការថែមទៀត។
លោក Emery ដែលធ្លាប់និយាយថា Ozil មិនមែនជាកីឡាករលោកចង់ប្រើនោះ បាននិយាយក្រោយចប់ការប្រកួតយប់មិញថា៖ “ថ្ងៃនេះ គាត់បានបង្ហាញអ្វីដែលគាត់ចង់ហើយ។ ប្រសិនបើគាត់អាចលេងបានដូច្នេះ យើងនឹងលេងប្រកួតច្រើនទៀតដែលមានគាត់ចូលរួម។ គាត់នឹងអាចជាប់ជម្រើស១១នាក់ដំបូង បើគាត់ប្រឹងប្រែងបន្ដទៀត”៕ប្រភព៖ dailymail
