• វិភាគ៖ AT Madrid ​ប៉ះ Juventus ​ពិបាក​នឹង​ស្មើ​ណាស់

    ក្រុម Atletico Madrid ​នឹង​បើក​កីឡដ្ឋាន​របស់​ខ្លួន​ស្វាគមន៍​ក្រុម​ភ្ញៀវJuventus ​នៅ​ម៉ោង​៣​រំលង​អាធ្រាត្រ​នេះ ​ក្នុង​ការ​ប្រកួត​ពាន​រង្វាន់ UEFA Champions League ​វគ្គ​១៦​ក្រុម​ចុង​ក្រោយ​ជើង​ទី​១។មុន​ការ​ប្រកួត​នេះ​ចាប់​ផ្ដើម លោក Diego Simeone ​អ្នក​ចាត់ការ​ក្រុម Atletico Madrid ​បាន​និយាយ​ថា​៖“ប៉ះ​ក្រុម​ល្អ​ដូច Juventus ​គឺ​ជា​ឱកាស​សម្រាប់​យើង​ពង្រឹង​ខ្លួន​បន្ថែម។ ពួកគេ​មាន​អ្នក​ចាត់ការ​ល្អ​ម្នាក់ ​ហើយ​ទើប​តែ​បាន​កីឡាករ​កំពូល​លើ​លោក​ថែម​ទៀត។ នេះ​ជា​ការ​ប្រកួត​ដ៏​ស្វិតស្វាញ​មួយ”។ដោយ​ឡែក​សម្រាប់​លោក Massimiliano Allegri ​អ្នក​ចាត់ការ​ក្រុម Juventus ​បាន​និយាយ​ដែរ​ថា​៖ “រាល់​ឆ្នាំ​យើង​តែងតែ​ប៉ះ​ក្រុម​ខ្លាំង​នៅ​វគ្គ​នេះ ហើយ​យើង​តែងតែ​លេង​ដោយ​ទំនុក​ចិត្ត​ដើម្បី​ឡើង​ទៅ​វគ្គ​។ AT Madrid ​ជា​ក្រុម​ខ្លាំង​មួយ ​ពួកគេ​លេង​បាន​យ៉ាង​ល្អ​ក្នុង​ការ​ប្រកួត​ធំ​ៗ។ ប៉ុន្តែ​ប្រកួត​នេះ​ខ្ញុំ​មិន​និយាយ​ថា​ស្មើ​ឡើយ ខ្ញុំ​នឹង​និយាយ​ថា​យើង​ត្រូវ​ការ​គ្រាប់​បាល់​ជា​ចាំ​បាច់”។

    ចំពោះ​កីឡាករ​របួស​វិញ ​ខាង​ម្ចាស់​ផ្ទះ AT Madrid ​មាន​តែ​កីឡាករ Hernández ​ម្នាក់​គត់​ដែល​អវត្តមាន ព្រោះ​រូបគេ​រង​របួស​ជង្គង់។ ​ក្រៅ​ពី​នោះ​សុទ្ធ​តែ​អាច​ចូល​លេង​បាន​ទាំង​អស់។ ដូច្នេះ​ជម្រើស​១១​នាក់​ដំបូង​នៅ​រាត្រី​នេះ​អាច​ជា Oblak; Arias, Giménez, Godín, Filipe Luís; Ñíguez, Koke, Rodri, Lemar; Morata, Griezmann។ សម្រាប់​ខាង​ក្រុម Juventus ​មាន​កីឡាករ​២​នាក់​មិន​បាន​លេង​គឺ Khedira ​បញ្ហា​បេះដូង និង Costa ​របួស​ភ្លៅ។ ជម្រើស​១១​នាក់​ដំបូង​របស់​ក្រុម​នេះ​អាច​ជា Szczęsny; Cancelo, Bonucci, Chiellini, Alex Sandro; Betancur, Pjanić, Matuidi; Dybala, Mandžukić, Ronaldo។

    អ្វី​ដែល​អ្នក​គាំទ្រ​ត្រូវ​តាម​ដាន៖

    . AT Madrid ​និង Juventus ​សុទ្ធ​តែ​ធ្លាប់​បរាជ័យ​នៅ​វគ្គ​ផ្ដាច់ព្រ័ត្រ​ដូច​គ្នា​នៅ UCL ​នេះ

    . កាល​ពី​ឆ្នាំ ២០១៤ ​ក្រុម​ទាំង​ពីរ​នេះ​ធ្លាប់​ជួប​គ្នា​ម្ដង​ហើយ ​ដោយ​គ្រា​នោះ AT Madrid ​ទម្លាក់ Juventus ​ដោយ​ជើង​ទី​១ ​នៅ​ទឹក​ដី AT ​ឈ្នះ ១-០ ​និង​ស្មើ​នៅ​ទឹក​ដី Juventus ​០-០។

    . Ronaldo ​នឹង​ប៉ះ​ក្រុម AT Madrid ​ជា​ថ្មី​ម្ដង​ទៀត ​ខណៈ​ដែល​រូបគេ​កាល​លេង​ឱ្យ Real Madrid ​ធ្លាប់​ប៉ះ​ក្រុម​នេះ​៣១​ដង ​រក​បាន​២២​គ្រាប់៕

    ប្រភព៖ Skysports

     

    ភ្ជាប់ទំនាក់ទំនងជាមួយ CTS SPORT