ការប្រកួតពានរង្វាន់ FA Cup ជុំទី៥ រវាងក្រុម Chelsea និង Manchester United ឈានចូលមកដល់នៅម៉ោង៣រំលងអាធ្រាត្រនេះហើយ។
នេះជាការប្រកួតធំមួយនៅអង់គ្លេស ត្បិតតែវាជាការប្រកួត Cup មែន ប៉ុន្តែក្រុមទាំងពីរនេះសុទ្ធតែចង់ឈ្នះដូចគ្នា ដើម្បីមានឱកាសលើកពានរង្វាន់នេះ។ បើមើលទៅលើស្ថិតិប្រកួតវិញ ក្រុម Chelsea ដែលជាក្រុមម្ចាស់ផ្ទះកំពុងជួបបញ្ហាបរាជ័យផ្ទួនគ្នា ដូច្នេះជ័យជម្នះនៅយប់នេះពិតជាសំខាន់ណាស់។ ដោយឡែកក្រុមបិសាចក្រហមវិញ ក៏ទើបតែបរាជ័យមកពី Champions League ដូចគ្នា ដូច្នេះពួកគេក៏ចង់បានលទ្ធផលដែរនៅរាត្រីនេះ។
លោក Ole អ្នកចាត់ការបណ្ដោះអាសន្នរបស់ក្រុម Man Utd បាននិយាយថា៖ “យើងរបួសកីឡាករ២នាក់ គឺ Anthony និង Jesse។ ដូច្នេះនេះជាឱកាសល្អសម្រាប់ Sanchez និង Lukaku បង្ហាញសមត្ថភាព។ ពួកគេសុទ្ធតែមានបច្ចេកទេសខ្ពស់ដូចគ្នាដើម្បីជួយក្រុមនៅរាត្រីនេះ”។
សម្រាប់លោក Gianfranco Zola គ្រូជំនួយរបស់ក្រុម Chelsea វិញ បាននិយាយដែរថា៖ “យើងដឹងពីបញ្ហាដែលកំពុងជួប ហើយខ្ញុំគិតថាប្រកួតនេះយើងត្រូវតែឈ្នះដើម្បីឱ្យអ្នកគាំទ្រសប្បាយចិត្តវិញ។ យើងត្រូវតែរកចំណុចខ្វះខាតដើម្បីបំពេញបន្ថែម”។
ចំពោះកីឡាកររបួសវិញ ខាងក្រុមម្ចាស់ផ្ទះ Chelsea មិនមានបញ្ហាកីឡាករណារបួសនោះទេ ពោលគឺពេញល្អតែម្ដង ប៉ុន្តែពួកគេហាក់ដូចជាលេងមិនទាន់ត្រូវជើងគ្នាឡើយ។ ជាពិសេសវត្តមានខ្សែប្រយុទ្ធចំណូលថ្មី Higuain តែម្ដង។ ប៉ុន្តែសម្រាប់ក្រុម Man Utd វិញ ក្រៅពីអវត្តមាន Lingard និង Martial ហើយ ពួកគេនឹងអវត្តមានខ្សែការពារ២នាក់ទៀតគឺ Antonio Valencia និង Matteo Darmian។
ប្រវត្តិជួបគ្នានៅ FA Cup
គិតទាំងយប់នេះទៀត ក្រុមទាំងពីរនេះប៉ះគ្នាបាន១៤ដងហើយ។ ខណៈដែល៤ដងចុងក្រោយគឺ Chelsea ទម្លាក់ Man Utd បានជានិច្ច។ បើគិតតែលេងនៅ Stamford Bridge ប៉ះគ្នា៥ដង គឺក្រុម Man Utd ចាញ់៣ដងទៅហើយ។ បើ Chelsea ឈ្នះទៀតនៅយប់នេះ គឺមានន័យថាពួកគេនឹងក្លាយជាក្រុមដំបូងដែលអាចទម្លាក់ក្រុម Man Utd បាន៥ដងជាប់គ្នាក្នុងការជួបគ្នានៅ FA Cup នេះ៕ប្រភព៖ Skysports