ឡៅ ចិត្រា សរសើរ Superlek ទោះចាញ់នៅ ONE Championship

តារាគុនខ្មែរវ័យ ១៩ឆ្នាំ ឡៅ ចិត្រា បានចូលរួមការប្រកួត ONE Championship កន្លងទៅថ្មីៗនេះ ប៉ុន្តែត្រូវប៉ះចំអ្នកលេងក្បាច់គុនមួយថៃខ្លាំងជាងគេម្នាក់លំដាប់ពិភពលោកនៅក្នុងព្រឹត្តិការណ៍ ONE: CLASH OF LEGENDS កាលពីថ្ងៃសោរ៍ ទី១៦ ខែកុម្ភះ។

ចិត្រា រៀបរាប់៖ «មុននឹងការប្រកួតចាប់ផ្តើម ខ្ញុំគិតថាខ្ញុំនឹងធ្វើឲ្យល្អ ហើយកម្លាំងខ្ញុំមាន អីផ្សេងក៏មានអស់ហើយ។ ប៉ុន្តែដូចចាញ់ក្បាច់គេតែម្តង គាត់រហ័សល្អណាស់!»

ចូលដល់ទឹកទី៣ ចិត្រា ចាប់ផ្តើមប្រឹងខ្លាំងអស់ពីខ្លួនរិះរកវិធីចូលវាយប្រហារ ដើម្បីធ្វើយ៉ាងណាយកជ័យជម្នះមកមាតុភូមិឲ្យបាន ប៉ុន្តែដោយភាពរហ័សរហួនខ្លាំង និងការសម្រុកក៏កាចសាហាវរបស់គូប្រយុទ្ធថៃ ធ្វើឲ្យសភាពខ្លួនប្រាណគាត់ទទួលរងភាពឈឺចាប់ខ្លាំងពេលប្រកួត។

«ដៃខ្ញុំឈឺ និយាយទៅគេទាត់ធ្ងន់ ទាត់ទៅឡកដល់មុខតែហ្មង។ ក្នុងចិត្តគិតថាទ្រាំ ហើយចង់ចូលវាយគេឲ្យសន្លប់ តែធ្វើទៅអត់បាន»

បន្ទាប់ពីការប្រកួតកម្មវិធី ONE Championship Super Series បានបញ្ចប់ ចិត្រា ឃើញថាមានស្មារតីល្អ ដោយសារត្រូវបានគេសរសើរពីសមត្ថភាពគាត់ច្រើន ព្រោះថាគាត់អាចទ្រាំទ្រទប់ទល់ជាមួយ Superlek បានដល់ចប់ទឹក។

ភ្ជាប់ទំនាក់ទំនងជាមួយ CTS SPORT