ខ្សែការពារ Marcelo អាចនឹងមានឱកាសចូលលេងវិញហើយនៅល្ងាចម៉ោង៦នេះ ទល់ក្រុម Girona ក្រោយពីខកខាន២ប្រកួតជាប់គ្នា។លោក Solari បានបញ្ជាក់ថា Marcelo បានរងរបួសតាំងពីលេងក្រោមការដឹកនាំរបស់លោក Lopetegui មកម្ល៉េះ។ ខណៈដែលក្រោយពីជាសះស្បើយវិញ រូបគេហាក់ដូចជាលេងមិនបានល្អឡើយ ដោយតែងតែបង្កឱ្យខូចបាល់ជាញឹកញាប់ និងជាពិសេសនោះគឺបាត់បង់ទំនុកចិត្តលើខ្លួនឯងតែម្ដង។ កត្ដានេះហើយ ទើបតម្រូវឱ្យរូបគេសម្រាកក្នុងការប្រកួត២ប្រកួតចុងក្រោយទល់ក្រុម Atletico Madrid និង Ajax ។
យ៉ាងណាមិញ អ្នកចាត់ការខាងលើបានបញ្ជាក់ថាការលេងទល់ក្រុម Girona នៅ La Liga ល្ងាចនេះ គឺជាឱកាសថ្មីមួយទៀតសម្រាប់ខ្សែការពារប្រេស៊ីលខាងលើ ដើម្បីចូលលេងបង្ហាញសមត្ថភាពវិញ។ Marcelo បានចាត់ជាខ្សែការពារស្លាបកំពូលលើលោក ប៉ុន្តែក្រោមការដឹកនាំរបស់លោក Solari ២៥ប្រកួតមកនេះ រូបគេចូលលេងបានតែ១៣ប្រកួតប៉ុណ្ណោះ៕
ប្រភព៖ Marca