ក្លឹប Manchester United បានសម្រេចចុះកុងត្រាទិញយកកីឡាករ Fred ពីក្លឹប Shaktar Donetsk ហើយ ក្នុងកុងត្រារយៈពេល៥ឆ្នាំ តម្លៃខ្លួន៥២លានផោន។
ទន្ទឹមនឹងការផ្លាស់ទៅលេងនៅ Old Trafford នេះដែរ Neymar ដែលជាមិត្តរួមក្រុមរបស់ Fred បាននិយាយជូនពរថា៖ “ខ្ញុំសង្ឃឹមថាគាត់នឹងជោគជ័យនៅក្លឹបថ្មី។ គាត់ជាកីឡាករមានទេពកោសល្យ។ គ្រប់គ្នានៅក្នុងជម្រើសជាតិប្រេស៊ីល សុទ្ធតែមើលឃើញចំណុចល្អរបស់គាត់ ដូច្នេះសង្ឃឹមថាគាត់នឹងបោះជំហានទៅមុខ ១កម្រិតទៀត”។
កីឡាករវ័យ២៥ឆ្នាំរូបនេះ ដំបូងឡើយក្រុម Manchester City ទេ ដែលចង់បានមុនគេ ប៉ុន្តែដោយសារតម្លៃខ្លួននិងលក្ខខណ្ឌមួយចំនួនមិនត្រូវគ្នា ទើបធ្វើឱ្យក្រុម Man Utd មានឱកាសដណ្ដើមយកបាន។ ខ្សែបម្រើរូបនេះ ទើបបានចូលរួមជាមួយក្រុមជម្រើសជាតិប៉ុន្មានប្រកួតចុងក្រោយនេះទេ បន្ទាប់ពីលោក Tite គ្រូបង្វឹកប្រេស៊ីលមើលឃើញសមត្ថភាពរូបគេល្អគ្រប់គ្រាន់ជួយក្រុមបាន៕ប្រភព៖DailyMail