• Solari ​ចង់​ឃើញ Messi ​អាច​លេង​បាន​ទល់​ក្រុម Real Madrid ​យប់​នេះ​

    លោក Solari ​អ្នក​ចាត់ការ​ក្រុម Real Madrid ​រំពឹង​ថា​ខ្សែ​ប្រយុទ្ធ Lionel Messi ​នឹង​អាច​ចូល​លេង​បាន​ក្នុង​ជំនួប El Clasico ​នៅ​រាត្រី​នេះ ​នា​ពាន​រង្វាន់ Copa del Rey ​វគ្គ​ពាក់​កណ្ដាល​ផ្ដាច់ព្រ័ត្រ​ជើង​ទី​១។

    Messi ​បាន​រង​របួស​អំឡុង​ពេល​លេង​ទល់​ក្រុម Valencia ​នា​ពាន​រង្វាន់ La Liga ​កន្លង​ទៅ។ របួស​នោះ​បាន​ធ្វើ​ឱ្យ​រូបគេ​អវត្តមាន​ហ្វឹកហាត់​ជាមួយ​ក្រុម​ប៉ុន្មាន​ថ្ងៃ ប៉ុន្តែ​នៅ​ម្សិលមិញ​នេះ ក៏​ចាប់​ផ្ដើម​ចូល​ហាត់​បាន​វិញ​ដែរ។ មិន​ត្រឹម​តែ​ប៉ុណ្ណោះ ​ក្រុម Barcelona ​ក៏​បាន​ដាក់​ឈ្មោះ​រូបគេ​ដើម្បី​ត្រៀម​តទល់​ជាមួយ Real Madrid ​នៅ​ទឹក​ដី Camp Nou ​ដូច​គ្នា។ យ៉ាងណាមិញ ​គេ​មិន​ប្រាកដ​ថា Messi ​អាច​ចូល​លេង​ជម្រើស​ដំបូង ឬ​អង្គុយ​កៅអី​បម្រុង​ឡើយ។

    ជាមួយ​ការ​មិន​ច្បាស់​នេះ​ដែរ ​លោក Solari ​អ្នក​ចាត់ការ​ក្រុម Real Madrid ​ពិត​ជា​ចង់​ឃើញ Messi ​ចូល​លេង​ឱ្យ Barcelona ​ណាស់។ លោក​បញ្ជាក់​ទោះ​ជា​មាន​ឬ​គ្មាន​វត្តមាន​របស់ Messi ​ក៏​មិន​ប៉ះ​ពាល់​ដល់​ទម្រង់​ក្រុម​អធិរាជ​ស ដើម្បី​តតាំង​ជាមួយ​ក្រុម​អ្នក​មាន​បុណ្យ​ដែរ ប៉ុន្តែ​បើ​អាច​មាន Messi ​នោះ​ការ​ប្រកួត​នឹង​កាន់​តែ​ល្អ​មើល៕ប្រភព៖ Standard

    ភ្ជាប់ទំនាក់ទំនងជាមួយ CTS SPORT