ក្រុមបាល់ទាត់ជម្រើសជាតិជប៉ុន នឹងត្រូវតតាំងជាមួយក្រុមអារ៉ាប៊ីសាអ៊ូឌីត ដើម្បីប្រជែងគ្នាយកកៅអីឡើងទៅវគ្គ៨ក្រុមចុងក្រោយពានរង្វាន់ AFC Asian Cup 2019 នៅវេលាម៉ោង៦ល្ងាចនេះ។
លោក Hajime Moriyasu គ្រូបង្វឹកក្រុមជប៉ុនបាននិយាយមុនការប្រកួតនេះថា៖ “បន្ទាប់ពីលេង៣ប្រកួតនៅវគ្គសន្សំពិន្ទុក្នុងពូល ក្រុមរបស់យើងបានរៀបចំល្អឡើងវិញហើយ ដើម្បីជួបជាមួយដៃគូដែលពិបាកបំផុតមួយ។ អារ៉ាប៊ីសាអ៊ូឌីត ជាក្រុមខ្លាំងនៅអាស៊ី ពួកគេមានកីឡាករពោរពេញដោយសមត្ថភាព និងចិត្តចង់ឈ្នះការប្រកួតខ្លាំង។ ខ្ញុំគិតថាប្រកួតនេះ ពិតជាតានតឹងមិនខាន។ ខ្ញុំបានប្រើកីឡាករទាំង២២នាក់នៅវគ្គសន្សំពិន្ទុ ដូច្នេះរំពឹងថានៅល្ងាចនេះនឹងជ្រើសបានជម្រើស១១នាក់ល្អបំផុតមួយសម្រាប់យកជ័យជម្នះ”។
នៅវគ្គសន្សំពិន្ទុក្នុងពូល ក្រុមជប៉ុនឈ្នះទាំង៣ប្រកួតតែម្ដង ប៉ុន្តែពួកគេនៅមានចំណុចខ្សោយខ្លះនៅតំបន់ការពារ។ ខណៈដែល អារ៉ាប៊ីសាអ៊ូឌីត វិញ ចាញ់១ប្រកួត។ ប្រវត្តិជួបគ្នារវាងក្រុមទាំងពីរនេះ គឺឈ្នះម្នាក់ម្ដងប៉ុណ្ណោះ ដូច្នេះហើយនៅល្ងាចនេះ មិនអាចសន្និដ្ឋានថាក្រុមណាមានប្រៀបជាងក្រុមណាឡើយ៕ប្រភពFoxsportsasia