ក្រុម Spurs បានយកឈ្នះលើក្រុម Fulham យ៉ាងពិបាក ២-១ នៅយប់មិញក្នុងការប្រកួតពានរង្វាន់លីគកំពូលអង់គ្លេស English Premier League ។
ត្បិតតែបាន៣ពិន្ទុបន្ថែមទៀតមែន ប៉ុន្តែ Spurs បានបាត់បង់កីឡាករសំខាន់ម្នាក់គឺ Dele Alli ដោយសារតែមានរបួសសរសៃពួរ។ ខណៈដែលរបួសនេះអាចនឹងធ្វើឱ្យខ្សែបម្រើរូបនេះមិនអាចចូលលេងឱ្យក្រុមមាន់ខ្នាយមាសបានទេ នៅវគ្គពាក់កណ្ដាលផ្ដាច់ព្រ័ត្រជើងទី២ Carabao Cup នៅថ្ងៃព្រហស្បតិ៍នេះ។
ក្រុមរបស់លោក Mauricio Pochettino កំពុងតែមានបញ្ហាកីឡាករសំខាន់ៗរបួសសឹងអស់ហើយ។ ជាក់ស្ដែង Harry Kane ខ្សែប្រយុទ្ធសំខាន់បំផុតក្នុងក្រុមក៏របួស Son កីឡាករមិនអាចខ្វះបានក៏ជាប់ភារកិច្ចជាមួយជម្រើសជាតិកូរ៉េខាងត្បូងថែមទៀត។ ហើយប្រសិនបើ Alli មិនអាចចូលលេងបានទៀត នោះក្រុម Spurs អាចនឹងពិបាកហើយនៅពេលប៉ះក្រុមខ្លាំង Chelsea នោះ។ យ៉ាងណាមិញនៅជើងទី១កន្លងទៅ ពួកគេបានយកឈ្នះក្នុងលទ្ធផល ១-០ រួចហើយ៕ប្រភពDailyMail
