លោក Jose Mourinho បានបង្ហើបថាបានបដិសេធការងារ៣កន្លែងមកហើយ តាំងពីចែកផ្លូវជាមួយក្រុមបិសាចក្រហម Manchester United មក។បុរសវ័យ៥៥ឆ្នាំខាងលើនេះត្រូវបានក្លឹប Man Utd បណ្ដេញចេញពីតំណែងអ្នកចាត់ការ ក្រោយពីដឹកនាំក្រុមមិនបានល្អ នារដូវកាលនេះ។ យ៉ាងណាមិញ ក្រោយពីការចាកចេញទៅនោះដែរ លោកនៅមិនទាន់សម្រេចចិត្តថាទៅធ្វើនៅខាងណាទៀតទេ ប៉ុន្តែក៏បានបង្ហើបថាមានគេទាក់ទងទៅធ្វើការងារ៣កន្លែងមកហើយ។
លោក Jose បានបញ្ជាក់ថាខ្លួននឹងចូលធ្វើការងារដឹកនាំក្រុមវិញ ប៉ុន្តែត្រូវដឹកនាំក្រុមដែលលោកគិតថានឹងធ្វើឱ្យខ្លួនសប្បាយចិត្ត។បុរសដែលត្រូវបានអ្នកគ្រប់គ្នាស្គាល់ថា ជាអ្នកចាត់ការពូកែចិត្តសាស្ត្រខាងលើនេះបាននិយាយថា៖
“ជាធម្មតាទៅហើយ ខ្ញុំត្រូវការពេលវេលាសម្រាកច្រើនក្រោយចប់ការងារនីមួយៗ។ ខ្ញុំចង់មើលនិងវិភាគចំពោះការងារថ្មី ថានឹងធ្វើឱ្យខ្ញុំសប្បាយចិត្តឬអត់ ទើបខ្ញុំឈានជើងចូលធ្វើការវិញ។ ខ្ញុំចូលចិត្តការប្រកួតប្រជែង ដូច្នេះហើយការងាររបស់ខ្ញុំក៏ត្រូវតែធ្វើអីចឹងដែរ។ ខ្ញុំមិនចង់និយាយច្រើនពីអនាគតទេ មានតែរង់ចាំមើលទាំងអស់គ្នា”៕
ប្រភព៖ DailyMail