លោក Solskjaer ដែលដឹកនាំក្រុមឈ្នះ៦ប្រកួតជាប់គ្នា កំពុងត្រូវបានថ្នាក់ដឹកនាំកំពូលរបស់ក្លឹបបិសាចក្រហម ពិចារណាដើម្បីចុះកុងត្រាយកធ្វើជាអ្នកចាត់ការតែម្ដង។
លោក Solskjaer ត្រូវបានក្លឹប Manchester United តែងតាំងជាអ្នកចាត់ការបណ្ដោះអាសន្ន ក្រោយពីបណ្ដេញលោក Jose Mourinho ចេញពីតំណែង។ គិតចាប់ពីចូលធ្វើការដឹកនាំរហូតមកដល់ពេលនេះ អតីតវីរបុរសរបស់បិសាចក្រហមខាងលើនេះ ដឹកនាំក្រុមបាន៦ប្រកួតមកហើយ ក្នុងនោះឈ្នះទាំង៦ប្រកួតតែម្ដង មិនមានស្មើ១ប្រកួតណាទេ។ អ្នកគាំទ្រនិងកីឡាករក៏ពេញចិត្តចំពោះការដឹកនាំរបស់បុរសម្នាក់នេះខ្លាំងផងដែរ។
ជាក់ស្ដែង ក្រោយពីជួយក្រុមឈ្នះ Spurs បានក្នុងលទ្ធផល ១-០ នោះ គឺរឹតតែធ្វើឱ្យអ្នកគាំទ្រស្រលាញ់លោក Solskjaer កាន់តែខ្លាំងថែមទៀត។ ក្នុងនោះដែរ លោក Ed Woodward ប្រធានបច្ចេកទេសផ្នែកកីឡារបស់ Man Utd ក៏បានទៅជួបផ្ទាល់ម្ដងទៀតជាមួយលោក Solskjaer និងកីឡាករទាំងអស់ផងដែរ ដើម្បីមើលទៅលើលទ្ធផលនានាដែលក្រុមធ្វើបានកន្លងមក។ ហើយវាក៏ជាសញ្ញាមួយអាចបញ្ជាក់បានថា ក្រុមបិសាចក្រហមនេះ កំពុងពិចារណាយកលោកSolskjaer នេះ ធ្វើជាអ្នកដឹកនាំក្រុមជាផ្លូវការផងដែរ៕ប្រភពDailyMail