លោក Gennaro Gattuso អ្នកចាត់ការក្រុម AC Milan បាននិយាយថាកូនក្រុមរបស់ខ្លួន Higuain បានសម្រេចចិត្តចាកចេញពីក្លឹបនេះទៅហើយ ដើម្បីចូលរួម ជាមួយក្រុម Chelsea បើទោះជាការផ្ទេរមិនទាន់ប្រកាសផ្លូវការក៏ដោយ។ប៉ុន្មានថ្ងៃមកនេះ ប្រភពជាច្រើនបានចុះផ្សាយថាអ្នកចាត់ការ Sarri របស់ក្រុម Chelsea កំពុងតាមទិញយក Higuain ដើម្បីនាំមកពង្រឹងតំបន់ប្រយុទ្ធរបស់ខ្លួនឡើងវិញ។ស្របពេលខ្សែប្រយុទ្ធអាហ្សង់ទីនរូបនេះបច្ចុប្បន្នកំពុងលេងឱ្យក្រុម AC Milan ក្រោមលក្ខខណ្ឌខ្ចីជើងពី Juventus ។ ប៉ុន្តែវត្តមានរបស់គេហាក់ធ្វើឱ្យអ្នកគាំទ្ររបស់ AC Milan មិនសប្បាយចិត្តទេ ព្រោះទម្រង់លេងមិនបានល្អឡើយ។
លោក Gennaro Gattuso អ្នកចាត់ការក្រុម AC Milan បាននិយាយចំពោះរឿងអតីតកីឡាករ Real Madrid ខាងលើថា៖ “ខ្ញុំជាមនុស្សចូលចិត្តនិយាយត្រង់ៗ។ ខ្ញុំបាននិយាយជាមួយគាត់ចំពោះរឿងទៅ Chelsea នេះ ហើយគាត់ក៏បានបង្ហាញមកខ្ញុំវិញថាគាត់ពិតជាចង់ចាកចេញទៅមែន។ វាពិតជារឿងពិបាកណាស់ ក្នុងការនិយាយឱ្យគាត់បន្ដនៅជាមួយយើងទៀត”៕
ប្រភព៖ DailyMail
