Kazuyoshi Miura វ័យ៥១ឆ្នាំ បានចុះកុងត្រាបន្ដលេង១ឆ្នាំទៀតឱ្យក្រុម Yokohama បើទោះជាវ័យរបស់ខ្លួនចាស់ខ្លាំងយ៉ាងនេះក្ដី។អតីតកីឡាករជម្រើសជាតិជប៉ុនខាងលើនេះ បានជាប់ឈ្មោះជាកីឡាករចាស់ជាងគេបំផុតលើលោក ព្រោះបច្ចុប្បន្ននេះលោកមានវ័យដល់៥១ឆ្នាំទៅហើយ។
យ៉ាងណាមិញ លោក Kazuyoshi នៅតែមានចិត្តជាកីឡាករដដែល ដោយលោកបានសម្រេចចិត្តចុះកុងត្រាលេង១ឆ្នាំទៀតឱ្យក្រុម Yokohama ដែលលេងនៅលីគលំដាប់ទី២របស់ជប៉ុន។ លេងបាន១ឆ្នាំនេះទៀត គឺមានន័យថាបុរសម្នាក់នេះប្រកបអាជីពបាល់ទាត់នេះបាន៣៤ឆ្នាំហើយ។Kazuyoshi Miura ចាប់ផ្ដើមលេងបាល់ដំបូងនៅឆ្នាំ១០៨៦ ជាមួយក្រុម Santos របស់ប្រេស៊ីល ហើយក៏បន្ដទៅលេងនៅក្លឹបជាច្រើនទៀតនៅប្រេស៊ីលនោះ មុនពេលផ្លាស់ចេញទៅលេងនៅបណ្ដាក្លឹបផ្សេងទៀត។
កីឡាករចាស់ជាងគេបំផុតលើលោកនេះ បាននិយាយក្រោយចុះកុងត្រានោះថា៖ “ខ្ញុំនឹងមិនខ្ជះខ្ជាយពេលវេលាសូម្បីតែ១វិនាទីឡើយ។ ខ្ញុំចង់ប្រកួតប្រជែងបន្ដទៀតជាមួយវិស័យបាល់ទាត់នេះ ហើយប្រឹងប្រែងហ្វឹកហាត់ ដើម្បីប្រមូលកម្លាំងឱ្យបានល្អបំផុត”។ លោក Kazuyoshi នេះដែរ បានបង្ហាញខ្លួនឱ្យជម្រើសជាតិជប៉ុនបាន៨៩ប្រកួតក្នុងរយៈពេល១០ឆ្នាំ និងជាប់ឈ្មោះជាកីឡាកររកគ្រាប់បាល់បានច្រើនលំដាប់លេខ២ ដោយមាន៥៥គ្រាប់៕ប្រភពDailyMail