ក្លឹប FC Barcelona ចង់បានខ្សែបម្រើ Willian របស់ក្រុម Chelsea ដើម្បីទៅជំនួសកន្លែងរបស់ Malcom ដែលក្លឹបទើបទិញមក ប៉ុន្តែលេងមិនបានល្អតាមអ្វីដែលក្លឹបចង់បាន។
ក្រុមយក្សអេស្ប៉ាញនេះ ចង់ផ្ដល់ឱ្យ Chelsea នៅតម្លៃខ្លួន៥០លានផោន ដើម្បីនាំយកខ្សែបម្រើប្រេស៊ីលនេះ។ នៅមានលក្ខខណ្ឌមួយទៀតដែលក្រុមអ្នកមានបុណ្យដាក់ស្នើទៅ គឺ Chelsea អាចយក Malcom ទៅបាន អមជាមួយប្រាក់តម្លៃខ្លួនបន្ថែមបន្តិចបន្ដួចទៀត ដើម្បីដូរយក Willian នេះ។
ខណៈដែល Willian នេះ ត្រូវបានក្លឹប Barca ចង់បានតាំងពីរដូវកាលមុនម្ល៉េះ ប៉ុន្តែការផ្ទេរទៅមិនបានសម្រេច។គេនៅចាំបានច្បាស់ថាកាលពីរដូវកាលមុន Barcelona បានតំឡើងតម្លៃខ្លួន Willian ដល់ទៅ៦៥លានផោនឯណោះ ប៉ុន្តែនៅតែមិនអាចធ្វើឱ្យ Chelsea ព្រមលក់បាន។ ស្របពេលបច្ចុប្បន្ននេះ Willian មានវ័យ៣០ឆ្នាំទៅហើយ និងសល់កុងត្រាត្រឹមតែ១៨ខែទៀតប៉ុណ្ណោះ ដូច្នេះហើយតម្លៃ៥០លានផោននេះ គឺសមល្មមសម្រាប់ក្រុម Chelsea លក់រូបគេចេញហើយ។
គ្រប់គ្នាដឹងច្បាស់ហើយថា តោខៀវមានគោលការណ៍របស់គេមួយ ដោយពួកគេមិនចង់ទុកកីឡាករណាដែលមានវ័យលើស៣០ឆ្នាំឡើយ។ ដូច្នេះហើយ បានជាក្រុម Barcelona រំពឹងថានឹងបានកីឡាករខាងលើជាក់ជាមិនខាន៕ប្រភពDailyMail
