Arjen Robben និង Franck Ribery នឹងចាកចេញពីក្រុម Bayern Munich នៅចប់រដូវកាលនេះ ក្រោយពីជួយក្រុមនេះអស់រយៈពេលជាង១០ឆ្នាំដូចគ្នា។
Robben វ័យ៣៤ឆ្នាំ លេងឱ្យក្រុម Bayern Munich នេះ១០ឆ្នាំមកហើយ ដោយបង្ហាញខ្លួន៣០៥ប្រកួត រកគ្រាប់បាល់បាន១៤៣គ្រាប់ និងជួយក្រុមនេះឈ្នះពាន Bundesliga បាន៧ដង និង Champions League បានម្ដង។ ដោយឡែក Ribery វិញ វ័យ៣៥ឆ្នាំហើយ បង្ហាញខ្លួនឱ្យក្រុមបាន១២ឆ្នាំ ចូលលេង៤០៩ប្រកួត និងរកគ្រាប់បាល់បាន១២២គ្រាប់។ លោកបានជួយក្រុម Bayern ឈ្នះពាន៨ដង និងពាន Champions League បាន១ដង។
លោក Uli Hoeness ប្រធានក្លឹប Bayern បានប្រាប់អ្នកគាំទ្រក្លឹបថាកីឡាករទាំងពីរនាក់នេះ កំពុងលេងរដូវកាលចុងក្រោយរបស់គេហើយ។ ស្របពេលសាមីខ្លួនក៏បានបញ្ជាក់ដែរថារូបគេនឹងចាកចេញពីក្លឹបក្រោយចប់រដូវកាលនេះដូចគ្នា ដើម្បីស្វែងរកបទពិសោធថ្មី៕ប្រភពTalksport
