ខ្សែប្រយុទ្ធ Neymar នៅមានបញ្ហារបួសធ្វើទុក្ខ អំឡុងពេលហ្វឹកហាត់ ដែលនេះជាកង្វល់មួយសម្រាប់ក្រុមជម្រើសជាតិប្រេស៊ីល ត្រៀមទៅ World Cup នាពេលខាងមុខ។
ប្រេស៊ីលកំពុងហ្វឹកហាត់នៅទឹកដីអង់គ្លេស ដើម្បីធ្វើការប្រកួតមិត្តភាពជាមួយក្រុមក្រូអាត នៅចុងសប្ដាហ៍នេះ។ អំឡុងពេលហ្វឹកហាត់នោះដែរ កីឡាកររបស់ក្រុម PSG រូបនេះ បានបង្ហាញថាខ្លួននៅមានបញ្ហាឈឺជើង នៅឡើយ ដែលតម្រូវឱ្យមានការសម្រួលសរសៃដោយក្រុមគ្រូពេទ្យ។
នេះអាចបញ្ជាក់បានថាការវិលត្រលប់មកវិញរបស់រូបគេ នៅមិនទាន់បាន១០០%នៅឡើយទេ។ មួយវិញទៀត ការព្យាបាលរបួសឱ្យបានឆាប់ជាលឿនរបស់គេ អាចនឹងបណ្ដាលឱ្យទៅជារឿងមិនល្អវិញ ពោលគឺព្យាបាលបណ្ដើរ បង្ហាត់បណ្ដើរ។
Neymar របួសជើងតាំងពីខែកុម្ភៈមកម្ល៉េះ ដោយបានសម្រាកព្យាបាលនៅប្រេស៊ីលអស់ពេលជាច្រើនខែ មុនមកព្យាបាលនៅក្លឹប PSG ហើយចូលរួមជាមួយក្រុមជម្រើសជាតិនេះ។ កីឡាករវ័យ២៦ឆ្នាំ រំពឹងខ្ពស់ថានឹងអាចបានចូលលេងឱ្យប្រេស៊ីលនៅ World Cup នាពេលខាងមុខ៕ប្រភព៖ DailyMail