Lionel Messi ពិតជាចង់បានពានរង្វាន់ FIFA World Cup ជាមួយក្រុមអាហ្សង់ទីនខ្លាំងណាស់ ដោយរូបគេបាននិយាយថាព្រមដូរពានរង្វាន់ដែលឈ្នះទាំងអស់ ឱ្យតែបានពាន World Cup ។
Messi ឈ្នះពានរង្វាន់ជាច្រើនជាមួយក្រុម Barcelona ប៉ុន្តែនៅជម្រើសជាតិអាហ្សង់ទីនវិញ រូបគេមិនទាន់បានជួយប្រទេសខ្លួនឈ្នះពានអ្វីមួយនៅឡើយទេ។ កីឡាករឆ្នើមរូបនេះ ឈ្នះពាន៣២ហើយជាមួយក្រុមអ្នកមានបុណ្យ ដោយពានទាំងអស់នេះ រូបគេព្រមដូរទាំងអស់ យកត្រឹមតែពាន FIFA World Cup ១គឺគ្រប់គ្រាន់ហើយ។
“ខ្ញុំអាចយកពានដែលឈ្នះនៅ Barcelona ទាំងអស់ មកដូរត្រឹមតែពាន១សម្រាប់ប្រទេសខ្ញុំប៉ុណ្ណោះ។ ឈ្នះពានជាមួយក្រុមអាហ្សង់ទីន វាគឺជារឿងអស្ចារ្យបំផុតក្នុងជីវិតខ្ញុំ។ យើងកំពុងតែធ្វើការជាមួយគ្នាបានយ៉ាងល្អ សម្រាប់ World Cup ឆ្នាំនេះ។ យើងមានកីឡាករច្រើន ដែលពោរពេញដោយបទពិសោធនិងសមត្ថភាពត្រៀមសម្រាប់លេង”។ សម្ដី Messi ។
សូមបញ្ជាក់ថា World Cup 2014 កន្លងទៅ ក្រុមជម្រើសជាតិអាហ្សង់ទីនបានឡើងដល់វគ្គផ្ដាច់ព្រ័ត្រ ប៉ុន្តែសោកស្ដាយចាញ់ក្រុមជម្រើសជាតិអាល្លឺម៉ង់ក្នុងលទ្ធផល ១-០ នៅប្រទេសប្រេស៊ីល។ ដោយឡែកសម្រាប់ត្រៀមលេងនៅ World Cup 2018 នេះវិញ រូបគេទើបតែបំបាក់ក្រុមជម្រើសជាតិហៃទី ៤-០ កាលពីព្រឹកមិញនេះ៕ប្រភព៖ DailyMail
