ក្រុមហង្សក្រហម Liverpool ធ្វើបានល្អមែនទែនកាលពីយប់មិញ ដោយអាចយកឈ្នះលើក្រុម Arsenal ដល់ទៅ៥-១ ឯណោះ។ក្នុងជ័យជម្នះនេះដែរ Firmino ខ្សែប្រយុទ្ធប្រេស៊ីលអាចរកគ្រាប់បាល់បាន៣គ្រាប់ម្នាក់ឯង ស្របពេល Salah វិញ ធ្វើបានត្រឹមតែ១គ្រាប់ប៉ុណ្ណោះ។ យ៉ាងណាមិញ ត្បិតតែរកបាន១គ្រាប់មែន ប៉ុន្តែលោក Klopp សរសើរកីឡាករអេហ្សីបខ្លាំងណាស់ ចំពោះទឹកចិត្តផ្ដល់បាល់ប៉េណាល់ទីឱ្យ Firmino ស៊ុតយក Hat-trick ។
លោក Klopp បាននិយាយថា៖ “Mo Salah បានផ្ដល់បាល់ប៉េណាល់ទី ទៅ Bobby Firmino ហើយខ្ញុំសឹងតែស្រង់ទឹកភ្នែកទៅហើយចំពោះទឹកចិត្តនេះ។ វាធំណាស់សម្រាប់គាត់ យើងដឹងថាគាត់ចង់បានគ្រាប់បាល់ប៉ុណ្ណាហើយ ប៉ុន្តែចុងក្រោយគាត់បែរជាផ្ដល់បាល់នោះទៅមិត្តរួមក្រុមដើម្បីឱ្យគេបានស៊ុត hat-trick ទៅវិញ។ វាពិតជាទឹកចិត្តល្អខ្លាំងណាស់”៕
ប្រភព៖ DailyMail