ក្រុមហង្សក្រហម Liverpool បានយកឈ្នះលើក្រុម Arsenal ក្នុងលទ្ធផល ៥-១ នាការប្រកួតលីគកំពូលអង់គ្លេសសប្ដាហ៍ទី២០ កាលពីយប់មិញនេះ។ក្រុម Arsenal មានឱកាសនាំមុខ១គ្រាប់មុនទៅហើយ ត្រឹមតែនាទី១១ប៉ុណ្ណោះ។ យ៉ាងណាមិញ ការនាំមុខ១គ្រាប់នេះ មិនអាចធានាបានលទ្ធផលល្អឡើយ ដោយត្រឹមតែ៣នាទីក្រោយមក Roberto Firmino រកបាន១គ្រាប់ស្មើវិញ និងបន្ថែមគ្រាប់នាំមុខនៅនាទី១៦ថែមទៀត។ មិនបានប៉ុន្មានផងនៅនាទី៣២ Mane អាចថែមបានគ្រាប់បាល់នាំមុខទៀត មុនពែល Salah បានប៉េណាល់ទី១គ្រាប់នៅនាទី៤២+២។ ចប់ត្រឹមវគ្គទី១ នេះ ក្រុម Liverpool នាំមុខក្រុម Arsenal ៤-១ ទៅហើយ។
ឈានដល់តង់ទី២ ក្រុមភ្ញៀវកាំភ្លើងធំព្យាយាមវាយសម្រុកបន្ថែមដែរ ដើម្បីស្វែងរកគ្រាប់បាល់មកវិញ ប៉ុន្តែការវាយសម្រុកនោះមិនបានផលឡើយ។ ផ្ទុយទៅវិញ ត្រូវម្ចាស់ផ្ទះ Liverpool ថែមគ្រាប់ទី៥បានទៀត ដោយ Firmino ដដែលនៅនាទី៦៤។
លទ្ធផលនេះ បញ្ចប់រហូតដល់ចប់ការប្រកួតតែម្ដង ។ទទួលបាន៣ពិន្ទុបន្ថែមនេះដែរ ក្រុម Liverpool បានដាច់ពិន្ទុក្រុមលេខ២ Spurs ដល់ទៅ៩ពិន្ទុទៅហើយ។ ខណៈដែល Spurs យប់មិញនេះ លេងចាញ់ក្រុម Wolverhampton ក្នុងលទ្ធផល ៣-១៕
ប្រភព៖ DailyMail