ក្រុម Manchester City នឹងត្រូវតតាំងជាមួយក្រុម Leicester City នៅម៉ោង១០យប់នេះ ក្នុងការប្រកួតលីគកំពូលអង់គ្លេស។
ក្រុមខ្លាំងមេឃខៀវ បានបរាជ័យក្រោមថ្វីជើងរបស់ក្រុម Crystal Palace កាលពីសប្ដាហ៍មុននេះ ដែលធ្វើឱ្យពួកគេចាញ់ពិន្ទុក្រុមកំពូលតារាង Liverpool ដល់៤ពិន្ទុហើយគិតត្រឹមបច្ចុប្បន្ន។ ដូច្នេះហើយនៅរាត្រីនេះ ពួកគេត្រូវការជ័យជម្នះដាច់ខាត ទើបអាចប្រជែងយកតំណែងកំពូលតារាងបានវិញ ក្នុងការប្រកួត Boxing Day នេះ។
លោក Pep បានប្រាប់ទៅកូនក្រុមមុនការប្រកួតនៅរាត្រីនេះថាពួកគេត្រូវលេងដោយទំនុកចិត្តឡើងវិញ។ បំភ្លេចចោលការប្រកួតដែលបរាជ័យកាលពីសប្ដាហ៍មុន។ ការយក៣ពិន្ទុឱ្យបាន គឺជារឿងចាំបាច់បំផុតសម្រាប់ក្រុមទាំងមូល ដើម្បីប្រជែងយកតំណែងកំពូលតារាងមកវិញ។ ត្បិតតែបានលេខ២ក្នុងតារាងនៅរដូវកាលនេះមែន ប៉ុន្តែអតីតអ្នកចាត់ការក្រុម Barcelona ខាងលើ មើលឃើញថាក្រុមលេងល្អជាងរដូវកាលមុនទៅទៀត ហើយក្ដីរំពឹងការពារតំណែងជើងឯកក៏នៅតែមានដែរ៕ប្រភពDailyMail