ក្រោយពីដោះស្រាយគ្នាជាច្រើនថ្ងៃមក ពេលនេះក្លឹបវិសាខានឹងយល់ព្រមបង់សំណងនៃការអភិវឌ្ឍកីឡាករទាំង៥នាក់នោះ។
បញ្ហាចម្រូងចម្រាសអំពីកីឡាករ៥នាក់ដែលក្លឹបវិសាខានាំយកពីក្លឹបភ្នំពេញក្រោនបានកើតមានឡើង បន្ទាប់ពីក្លឹបភ្នំពេញក្រោន បានព្រមានដកខ្លួនចេញពីលីគកម្ពុជា ប្រសិនបើគ្មានដំណោះស្រាយឱ្យសមស្រប។ ក្នុងនាមជាអាជ្ញាកណ្ដាល សហព័ន្ធកីឡាបាល់ទាត់កម្ពុជា បានចូលខ្លួនមកដោះស្រាយ ដោយហៅភាគីទាំងសងខាងមកនិយាយរកវិធីទៅមុខ ក្នុងនាមជាក្លឹបបាល់ទាត់ខ្មែរដូចគ្នា ។
ជាផ្លូវការ តាមលិខិតរបស់សហព័ន្ធចុះផ្សាយនោះ ក្លឹបវិសាខា ព្រមបង់សំណងនៃការអភិវឌ្ឍកីឡាករទាំង៥នាក់នោះឱ្យក្លឹបភ្នំពេញក្រោនហើយ។ កីឡាករទាំង៥នាក់ រួមមាន អ៊ុក សុវណ្ណា ស៊ីន កក្កដា អ៊ិន សុដាវិត គឹម ឆាយា និង កែន ចាន់សុភ័ក្ត្រ៕
