លោក Solskjaer ត្រូវបានតែងតាំងមកដឹកនាំក្រុម Manchester United បណ្ដោះអាសន្នរហូតដល់ចប់រដូវកាលនេះ ក្រោយពីក្លឹបបានប្រកាសចែកផ្លូវជាមួយលោក Jose Mourinho កាលពីសប្ដាហ៍មុន។
ក្នុងការដឹកនាំដំបូងនេះដែរ គេសង្កេតឃើញថាក្រុមហាក់ដូចជាប្លែកជាងមុន ជាពិសេសការប្រកួតដំបូងបានយកឈ្នះលើក្រុម Cardiff City ដល់ទៅ ៥-១ ឯណោះ។ ជ័យជម្នះនេះហើយ បានធ្វើឱ្យអ្នកគាំទ្រក្រុមបិសាចក្រហមសប្បាយចិត្តវិញ ក្រោយពីខកខានរកគ្រាប់បាល់បាន៥គ្រាប់នេះជាយូរមកហើយ តាំងពីលោក Sir Alex ចាកចេញទៅ។
មួយវិញទៀត មានប្រភពបានបញ្ជាក់ថាលោក Sir Alex ដែលបច្ចុប្បន្នមានតួនាទីជាប្រធានកីឡានៅ Man Utd បានមកណែនាំផ្ទាល់តែម្ដងដល់លោក Solskjaer ក្នុងការដឹកនាំក្រុមបិសាចក្រហមនេះ។ មិនត្រឹមតែលោកម្នាក់ទេ សូម្បីតែជំនួយការ Mike Phelan ក៏បានទទួលយោបល់ពីលោក Sir Alex ផងដែរ។ កត្តានេះហើយ កាន់តែធ្វើឱ្យអ្នកគាំទ្រសប្បាយចិត្តថែមទៀត នៅពេលដែលមានវីរបុរសរបស់ខ្លួនមកដឹកនាំក្រុមវិញដូច្នេះ៕ប្រភពDailyMail
