Salah ​ហោះ​ទៅ​អេស្ប៉ាញ ​ព្យាបាល​របួស​ស្មា ​សង្ឃឹម​ជា​ទាន់ World Cup

សហព័ន្ធ​កីឡា​បាល់ទាត់​អេហ្ស៊ីប ​បាន​បញ្ជាក់​ថា​ខ្សែ​ប្រយុទ្ធ Salah ​នឹង​ទៅ​ប្រទេស​អេស្ប៉ាញ​ស្អែក​នេះ ដើម្បី​ព្យាបាល​របួស​ស្មា​របស់​ខ្លួន ​ដើម្បី​ឱ្យ​ជា​ទាន់​ពេល​វេលា​ទៅ World Cup ។

របួស​ស្មា​របស់ Salah ​កំពុង​តែ​ធ្វើ​ឱ្យ​អេហ្ស៊ីប​មាន​កង្វល់​ជា​ខ្លាំង ​ព្រោះ​ខ្លាច​បាត់​បង់​កីឡាករ​ឆ្នើម​បំផុត​ក្នុង​ក្រុម នា​ព្រឹត្តិការណ៍ World Cup ​នៅ​រុស្ស៊ី​ខែ​ក្រោយ​នេះ។ ដើម្បី​ជា​ការ​ព្យាបាល​ឱ្យ​បាន​លឿន​បំផុត​នោះ ​អេហ្ស៊ីប​នឹង​បញ្ជូន Salah ​ទៅ​អេស្ប៉ាញ​ ដើម្បី​ធ្វើ​ការ​វះ​កាត់​នៅ​ថ្ងៃ​ស្អែក​នេះ។

ទាក់ទិន​បញ្ហា​របួស ​ខ្សែ​ប្រយុទ្ធ​រក​បាន​៤៤​គ្រាប់​នា​រដូវ​កាល​នេះ ​បាន​បង្ហោះ​លើ​បណ្ដាញ​សង្គម​ថា​រូបគេ​ជឿ​ជាក់​ថា​នឹង​អាច​ចូល​លេង​បាន​នៅ World Cup ​ជួយ​អេហ្ស៊ីប។ កម្លាំង​ចិត្ត​នៃ​អ្នក​គាំទ្រ ​គឺ​ជា​ថ្នាំ​ព្យាបាល​ល្អ​បំផុត​សម្រាប់​គេ ក្នុង​ការ​ជា​សះស្បើយ​ពី​របួស​។

ក្រុម​ជម្រើស​ជាតិ​អេហ្ស៊ីប ​ស្ថិត​នៅ​ពូល A ​ជាមួយ​ក្រុម​ម្ចាស់​ផ្ទះ​រុស្ស៊ី ​អារ៉ាប៊ីសាអ៊ូឌីត ​និង​ក្រុម​ជម្រើស​ជាតិ​អ៊ុយរុយហ្គាយ។ ការ​ប្រកួត​ពាន​រង្វាន់ World Cup ​នឹង​ធ្វើ​ឡើង​នៅ​ថ្ងៃ​ទី​១៤​ខែ​មិថុនា​ឆ្នាំ​២០១៨​ខាង​មុខ​នេះ​ហើយ៕ប្រភព៖ DailyMail

 

 

 

 

ភ្ជាប់ទំនាក់ទំនងជាមួយ CTS SPORT