លោក Ole Gunnar Solskjaer អ្នកចាត់ការថ្មីរបស់ក្រុមបិសាចក្រហម Manchester United ចង់ឱ្យកីឡាករក្នុងក្រុមទាំងអស់ លេងដោយសប្បាយចិត្ត ចូលចិត្តការប្រកួត មិនមែនលេងដោយការបង្ខំនោះទេ។
ក្នុងពេលមកដឹកនាំក្រុមហ្វឹកហាត់លើកដំបូង អ្នកចាត់ការដែលមកជំនួសតំណែងលោក Jose Mourinho ខាងលើនេះ សប្បាយចិត្តនិងទទួលបានការស្វាគមន៍យ៉ាងកក់ក្ដៅពីសំណាក់ក្រុមកីឡាកររបស់បិសាចក្រហម។ ក្នុងឱកាសនោះដែរ លោក Ole Gunnar Solskjaer បាននិយាយទៅកាន់កីឡាករទាំងអស់ថា សូមលេងដោយសប្បាយចិត្ត និងមិនបាច់គិតពីរឿងសម្ពាធអ្វីនោះទេ។ ការលេងបាល់ទាត់ គឺជាអាជីពមួយ ដែលតម្រូវឱ្យអ្នករាល់គ្នា ខិតខំលេង ដោយភាពរីករាយ សប្បាយចំពោះការប្រកួត ព្រោះបាល់ទាត់មិនមែនគិតតែលើលទ្ធផលមួយមុខនោះទេ។
វីរបុរសរបស់ក្រុម Man Utd ខាងលើបន្ដទៀតថា លោកសប្បាយចិត្តណាស់ដែលបានមកដឹកនាំ ក្រុមមួយពោរពេញដោយកីឡាករល្អៗ និងមានទេពកោសល្យបែបនេះ។ ទោះជាមិនទាន់បានធ្វើការជាមួយគ្នាយូរមែន ប៉ុន្តែលោកមានអារម្មណ៍កក់ក្ដៅ ពេលដែលបានឃើញក្រុមកីឡាករស្វាគមន៍យ៉ាងរាក់ទាក់យ៉ាងនេះ៕ប្រភពDailyMail