Al-Ain បានយកឈ្នះលើក្រុម River Plate ដោយបាល់កាត់សេចក្ដី១១ម៉ែត្រ ៥-៤ ក្រោយពីពួកគេលេងបានត្រឹមស្មើគ្នា ២-២ នៅ១២០នាទី ក្នុងការប្រកួតពាក់កណ្ដាលផ្ដាច់ព្រ័ត្រ FIFA Club World Cup 2018 ។
ការប្រកួតរវាងក្រុមទាំងពីរ ពិតជាស្វិតស្វាញខ្លាំងមែនទែន ក្រោយពីរកគ្រាប់បាល់បានទៅវិញទៅមក ២-២ ហើយនោះ។ ចំណាយពេលដល់១២០នាទីហើយក៏មិនទាន់រកឃើញក្រុមឈ្នះចាញ់នៅឡើយទេ រហូតដល់ឈានចូលវគ្គទាត់បាល់ប៉េណាល់ទីតែម្ដង។ នៅវគ្គនេះហើយ ក្រុមទាំងសងខាងនៅតែធ្វើបានល្អដដែល ប៉ុន្តែគ្រាប់ទី៥របស់ក្រុម River Plate ដែលទាត់ដោយ Perez នោះ ធ្វើមិនបានល្អ ទើបបណ្ដាលឱ្យក្រុមបរាជ័យនៅវគ្គនេះតែម្ដង។
Al Ain ជាក្រុមតំណាងម្ចាស់ផ្ទះចូលរួមកម្មវិធីខាងលើនេះ។ ដោយពួកគេប្រកួតបើកឆាកប៉ះជាមួយក្រុម ES Tunis យកឈ្នះក្នុងលទ្ធផល ៣-០។ ហើយឡើងមកដល់វគ្គនេះ ពួកគេយកឈ្នះ River Plate ទៀត ដើម្បីឡើងវគ្គផ្ដាច់ព្រ័ត្រ។ ១ក្រុមទៀតនឹងត្រូវរកឃើញនៅថ្ងៃនេះ រវាងក្រុម Real Madrid ប៉ះជាមួយក្រុម Kashima Antlers របស់ជប៉ុន។ ការប្រកួតនឹងធ្វើឡើងនៅម៉ោង១១:៣០នាទីយប់៕ប្រភពDailyMail
